Luna sa Barangay Taptap himoong tourist spot

CEBU, Philippines — Tungod sa kanindot sa talan-awon sa 9.2 nga ektarya nga luna sa Kagamhanan sa Siyudad sa Sugbo nga nahimutang sa Barangay Taptap, giingong giplanohan kini nga himoong usa sa mga tourist spot.

Mao kini ang luna nga giatiman sa Cebu City Resource Management and Development Center (CREMDEC) diin gipatubo ang daghang mga ornamental plants ug kahoy.  

Suma pa sa pangulo sa campus development section sa CREMDEC nga si Dr. Alice Utlang nga hinay-hinay na nga gipanindot ang landscape sa ilang buhatan.

Plano usab nila nga butangan ang usa sa ilang area og coffee shop kun diin “Bahay Kubo” ang konsepto niini.

Nasayran nga misaka ang kita sa CREMDEC sa ilang gipananum nga mga ornamental plants.

Suma pa ni Utlang nga sa buwan sa Septiyembre, nikita ang ilang buhatan og P33, 440 nga mapunta sa panudlanan sa siyudad.

Sulod sa pipila ka buwan, nakuha nila ang monthly target nga P30 mil ngadto sa P50 mil nga kita. /MEL (BANATNEWS)