Labella uyon nga padayon ang MGCQ

CEBU, Philippines — Uyon si Mayor Edgardo Labella nga magpabilin sa Modified General Community Quarantine ang dakbayan sanglit nagtuo ang mayor nga kun wagtangon ang mga gipangdili karon, mobalik og saka ang mga kaso sa  COVID-19 sa siyudad.

Sulod sa usa ka buwan nga pagpaubos sa dakbayan sa MGCQ nakita ang paspas nga pagkubos sa mga kaso niini ug gani pipila ka adlaw na nga dili na maabot og tag napulo ka kaso ang natala.

Niadtong adlaw nga Lunes ang labing ubos nga bag-ong kaso nga natala sa dakbayan nga tulo lang ka buok base sa gipagawas nga resulta sa Department of Health Central Visayas.

Ang maong kalambuan gihangop sa mayor apan kini mitataw nga dili gihapon angayan mokompiyansa sanglit naa gihapon ang presensiya sa virus ug angayan gihapon nga mosunod sa minimum health protocols.

“Sumala sa atong gihimo nga duna gyud tay mga restrictions mao na kining usa na sa hinungdan nalipay gani ko nga akong gitagaan sa tahas si Councilor Dave Tumulak ug si Raquel Arce pag put in place kaning atong mga cemeteries nga kinahanglan although magsira ta sa mga adlaw nga mao say gisulti sa IATF pero samtang karon nag-abli ta dunay strict implementation and regulation,” ni Labella pa.

Kun mapatuman ang rekomendasyon sa Department of Health nga ipaubos gihapon sa MGCQ ang dakbayan sa tibuok buwan sa Oktubre ,estrikto gihapon nga ipatuman ang pagamit sa mga quarantine pass.

Wala say plano ang mayor nga wad-on ang mga quarantine control points sa kapolisan diha sa kadalanan.

Sumala pa sa mayor nga bisan niubos na ang kaso sa COVID19 sa dakbayan nga tag “single digit” nalang sulod na sa pipila ka adlaw,  gitambagan mayor ang katawhan nga dili gihapon mokompiyansa.

“As I’ve said over and over again let us not be complacent, let us not flaunt this, let us not aggrandize this but we should serve this as a challenge for all of us to be more vigilant, to be more circumspect and to be more careful sa atong inadlaw nga buluhaton and to strictly comply with the basic minimum health requirements,” sigon ni Labella.

Iyaha usab nga tun-an ang posibilidad nga duna pay  buksan  nga dugang  mga negosyo .

Nagkanayon ang mayor nga ang pagkibra sa kaso sa COVID19 maoy resulta sa kooperasyon sa publiko,  kapulisan , nagkadaiyang sektor , medical frontliners, ug uban pa.

Sa kasamtangang estado, ang religous gatherings mahimo lang sa 50% nga kapasidad sa venue.

Mapasalamaton usab siya sa barangay officials gumikan sa pagtabang niini sa kampanya batok COVID19.

Suma pa ni Labella nga gikan sa  52 ka barangay isolation centers (BIC) , niabot na lang og upat ka  BIC ang nahibilin karon nga nagpasabot nga nihinay na gyud ang kaso sa maong gikabalak-an nga sakit. — Sanden J. Anadia/IBM (BANATNEWS)