Mga vendors sa mga sam-ang di patindahon

CEBU, Philippines — Gisugdan na sa Cebu City Prevention, Restoration, Beautiful, and Enhancement (PROBE) ang pagpangapud-apod sa mga notisya sa tanang mga naninda diha sa sulod ug palibot sa mga sam-ang sa siyudad. Ang notisya matud pang Raquel Arce, pangulo sa PROBE, paghatag kini sa mga vendors og panahon  nga boluntaryong gub-on ilang mga tindahan sud sa lima ka adlaw aron mapuslan pa ang ilang mga materyales.

Gihatagan nila kini og lima ka adlaw nga tagal alang sa boluntaryong paguba sa ilang mga tindahan.

Hinuon gikalipay ni Arce nga dunay uban nga boluntaryo ng niguba sa ilang mga tindahan bisan wala pa mahatagi og notisya.

Sa sayo pa, niisyu og executive order si Mayor Edgar Labella nga nagdili sa pagpamaligya diha sa mga sementeryo ug pagpasira sa mga sam-ang gikan Oktubre  31 hangtud  Nobiyembre 3 isip kabahin pagpugong sa pagkatap sa COVID-19.

Ang mga vendors hatagan og hinabang sa siyudad akip na ang mga sepulturero.   Nangayo ang mayor og pagsabot sanglit alang ra usab kini sa kaayohan sa kadaghanan . Niadto pang Septiyembre 26 gihugtan ang pagbantay aron di maghuot ang mga tawo nga niuna na pagpanagkot tungod sirad-an ang sam-ang atol sa kalag-kalag. Samtang si Police Lt. Col. Clark Arriola, Information Officer sa Cebu City Police Office miingon niadtong Septiyembre 26 nga unang adlaw nga gipasudlan ang mga sam-ang dili pa kaayo daghan ang nanagkot.

Gawas sa mga sam-ang, duna say mga polis nga gipakatap sa mga terminal, pier, Freedom Park ug buwakan sa Barangay Busay. Sanden Anadia/IBM (BANATNEWS)