Duha ka sunog niulbo sa Cebu City ug Lapu-Lapu
CEBU, Philippines — Duha ka sunog ang niulbo sa managlahi nga lugar sa Dakbayan sa Sugbo ug Lapu-Lapu niadtong Biyernes sa gabii ug kagahapon sa buntag.
Unang sunog nahitabo diha sa Sta. Teresita Village, Sitio Tisa Proper, Barangay Tisa, Dakbayan sa Sugbo, niadtong Biyernes sa alas 10:30 sa gabii.
Ang sunog giingong nagsugod sa panimalay nga gipanag-iya ni June Encorporado apan ipaubos pa hinuon kini sa imbestigasyon sa kabomberohan.
Hinuon ang maong sunog giisa lang kini sa first alarm ug nakontrolar ang kayo alas 10:41 ug hingpit nga na fire out pagka-alas 10:50.
Ang maong sunog aduna lang kini P3,000 nga danyos ug walay gikataho nga nakalas apan adunay lima nga nangaangol.
Laing sunog ang niulbo diha sa Barangay Pajac, Dakbayan sa Lapu-lapu kagahapon sa buntag diin usa ka ktv bar ang naugdaw.
Ang maong sunog giisa usab sa first alarm ug nikabat ngadto sa P150 mil ang danyos niini.
Ang kabomberohan nagpahigayon usab og follow up nga imbestigasyon sa maong insidente. /BDB (BANATNEWS)
- Latest