Kapin P3 milyones kamanggahan nadaut sa bagyo

CEBU, Philippines — Niabot ngadto sa P3.75 milyones ang danyos sa mga manggahan sa siyudad sa Sugbo tungod sa nagsagunson nga ulan sa miaging mga adlaw.

Matud pa sa pangulo sa City Agriculture Department (CAD) nga si Joey Baclayon nga partikular  naapektohan og maayo ang mango farm nga nahimutang sa Barangay Mabini.

Moabot ngadto sa 205 ka punoan sa manga ang nangadaut tungod sa kusog nga ulan.

Gitun-an na karon sa iyang buhatan ang pamaagi sa pagtabang alang sa mga naapektohan nga mag-uuma.

Dasigon usab niya ang mga mag-uuman nga mo-apply sa Philippine Crop Insurance Corporation (PCIC)  aron makaangkon og libreng insurance.

Sumala pa ni Baclayon nga nahinabi sa Banat News nga aduna na’y 1,700 ka mag-uuma ang nikuha na og insurance .

Matud pa ni Baclayon nga  ang CAD maoy nitabang sa pag-facilitate niini aron ma-enroll ang mag-uuma ngadto sa PCIC .

Si Cebu City Mayor Edgardo Labella miasoy siguraduhon gyud nga ma-rehabilitate ang maong manggahan ug kini ilang tukion sa ipatawag niyang meeting sa City Agriculture Department, CCDRRMO, Department of Social Welfare and Services, City Engineering ug City Administrator.

Matud sa mayor, kay biktima man sila sa kalamidad kwalipikado silang mahatag og hinabang sa siyudad sama sa ubang biktima sa kalamidad.

“These are all disaster victims so I think they can qualify sa kind of assistance nga atong gihatag sa mga victims sa sunog ug ubang pang victims sa disaster o calamities,” ni Labella pa.

Sa pikas bahin, gipasusi na sa mayor Department of Engineering and Public Works tanang mga lugar sa siyudad nga dunay nahitabong pagdahili sa yuta ug kadtong mga gipanglunopan sa baha.

Particular sa ipasubay sa mayor mao ang drainage systems o mga kanal nga posibleng napuno na sa mga basura ug gapnod.

Labing minus, unom ka landslide  ang nahitabo sa nagkadaiyang narangay ug mga gilunopan sa baha ang dili mominos napulo ka mga lugar niadtong Martes hangtud Miyerkules epekto sa bagyong Leon.

Samtang way nakalas sa hitabo, dunay kapin 100 ka tawo ang naapektahan ug gipabakwit sa mas luwas nga dapit. Sila gikan sa Barangay Talamban, Tisa, Guadalupe, Kalunasan,  Kasambagan ug Labangon. — Decemay Padilla, Rowena Capistrano/IBM(BANATNEWS)