Di COVID-19 gikamatyan sa mga Garcia

CEBU, Philippines — Giklaro nilang Cebu Governor Gwendolyn Garcia ug igsuong si third district Representative Pablo John Garcia nga wala namatay ang ilang mga igsoon sa novel coronavirus disease (Covid-19).  Atol sa ilang press conférence kagahapong adlawa, ang gobernador nitug-an nga ang namatyan ni kanhi Dumanjug Mayor Nelson Garcia mao ang cardio pulmonary arrest secondary to probable pulmonary embolism.

Samtang ang namatyan ni Barili Mayor Marlon Garcia mao ang septic shock secondary catheter related blood stream infection, ventilator associated pneumonia.

Base kini sa death certificate sa duha ka opisyal ug way nakabutang nga may koneksyon sa Covid-19 ang ilang kamatayon. Hinuon ang duha parehong natakboyan sa Covid-19 apan pareho silang naka-recover niini. Bisan si Cong PJ nagpositibo usab sa Covid-19 apan naayo ra kini.

“Yes they both tested positive for Covid-19 as did I around the same period. But they had recovered from Covid-19. Their doctors, themselves, in the death certificates would show that they recovered from Covid-19,” matud sa kongresista.

Nagduda

Natingala hinuon silang duha kun nganong nigrabe ang kondisyon sa ilang mga igsuon nga nanagaayo naman unta sila sa Covid-19. Ang duha parehong namatay  sa hospital.

Parehong na-intubate ang managsuong Garcia niadtong Agosto 13 hangtud nga sila nangaayo apan matud sa gobernador gidid-an ang iyang mga igsoon nga mogawas sa tambalanan.

Andam unta mopirma og waiver si Mayor Marlon aron makagawas sa hospital.  Niadtong Agosto 24 nipadala og text message si Mayor Marlon kang Liloan Mayor Christina Garcia-Frasco.  “Niingon si Marlon, I have been here for more than 17 days, I am  okay na gyud, please tell your mom (Gov. Gwen), to tell the doctor I will sign a waiver. I just want to go home, I am more worried about the bills piling up,” butyag sa gobernador bahin sa text message ni Marlon ngadto kang Liloan Mayor Frasco.

Bill sa hospital

Ang bill ni Mayor Marlon niabot na og P5.2 milyones samtang kang Nelson kapin P3 milyones na sa hospital wala pay labot sa doctor’s fee.

Tungod ato, makigtigom unta ang pamilyang Garcia sa doktor sa ilang igsoon apan ang  duha ka doktor wala motambong hinungdan nga nagkaestorya sila pinaagi sa tawag  diin didto nasayran nila nga dili mosugot ang doktor nga igawas ilang igsoon.

“Siya na mismo ang niingon, nga okay wala na ang virus, amo na na sila ibalhin gikan sa Covid ICU ngadto sa kadtong ilang special ICU nga naay usa ka nurse nga magbantay,” matud sa gobernador. Ang usa nila ka igsuon nga si CFI President Winston Garcia miingon sab nga iyang gisultihan ang doktor nga ang ICU “maoy labing infectious nga environment” kay siya mismo nakasuway og major operation ug ang doktor dili motugot nga magdugay siya sa ICU human sa operasyon kay kadaghanan sa bacteria sa ICU, multi-drug resistant na.  Mao usab kini ang gisulti sa ilang iyaan nga usa ka anesthesiologist nga atoa nagbase sa Amerika.

Gihilantan

Matud pa nga Agosto 25, gihilantan si Mayor Nelson ug Mayor Marlon ug didto nabantayan nga anam-anam na og kaluya ang duha, ug nanggawas na ang mga infection o sakit.

“Obviously secondary bacterial infection has set in. And I was really-really scared because I was beginning to see nga although magkalahi lahi sila ang pagsulod, pareha ang pattern,” matud sa gobernador.

Nasayran usab nga na hemodialysis na ang duha.

Namatay si Mayor Nelson Septiyembre 1 ug paglabay og lima ka adlaw nisunod si Mayor Marlon.

Tungod niini nakapangutana ang ilang pamilya nganong nahitabo kini sa ilang mga igsoon nga susama ang sirkumstansya.  Wala pa hinoon mobutyag ang mga Garcia kun dunay legal action nga ilang buhaton sanglit mokonsulta pa sila sa eksperto.

“We will ask experts to look at this and weigh in what we could have done differently. Would have it been more prudent not put them in highly infectious environment,” matud ni PJ Garcia.  Ang gobernador ug kongresista parehong emosyonal samtang nagestorya sa gidangatan sa ilang mga igsuon. /IBM (BANATNEWS)