19 ka armas gisurender
Cebu, Philippines — Nikabat ngadto sa 19 ka loose firearms ang boluntaryo nga gitahan sa mga tag-iya niini nga nagpuyo diha sa kabukirang lugar sa Dakbayan sa Sugbo atol sa duha ka hugna nga operasyon sa Cebu City Mobile Force Company.
Kini ang gitug-an ni Police Lieutenant Colonel Rene Kyamko, hepe sa City Mobile Force Company.
Matud ni Kyamko nga niadtong una nilang operasyon sa buwan sa Agosto niining tuiga adunay 10 ka nagkalainlaing armas ang gitahan sa ilang buhatan gikan sa mga tawo nga nanag-iya niini.
Laing siyam ka armas ang gisurender usab sa mga tag-iya niini ngadto sa CMFC niadtong Septiyembre 12 hangtud 14, 2020 atol sa ilang ikaduha nga operasyon gikan sa Pung-ol, Bonbon ug Babag.
Gibutyag ni Kyamko nga kadaghanan sa mga armas nga gisurender mga karaan kini ug posibleng gitiner kini sa mga nitahan niini isip ilang self-defense kanhi ilabina nga anaa sila magpuyo sa bukirang lugar.
Si Kyamko mapasalamaton tungod sa pagsalig sa mga tag-iya sa maong mga armas ngadto sa kapolisan.
Dugang ni Kyamko nga dako usab ang ilang pasalamat sa mga opisyal diha sa mga bukirang barangay sa pagkonbinsir sa mga tawo nga naghupot og armas sa pagtahan niini. (BANAT NEWS)
- Latest