Tulo ka sakop sa pamilya sikop sa buy-bust sa liloan
CEBU, Philippines — Nadakpan ang managkapuyo ug pag-umangkon niini nga babaye atol sa sa buy bust operation nga gipahigayon sa mga sakop sa Provincial Intelligence Unit sa Cebu Provincial Police Office (CPPO) diha sa Sitio Agay-ay sa Barangay Poblacion, Lungsod sa Liloan
Si Lieutenant Colonel Randy Korret ang hepe sa PIU sa CPPO nga maoy nangulo sa buy-bust operation miila sa mga nadakpan nga sila si Arnold Ortega, 45 anyos ug kapuyo niini nga si Violeta Obsequies, 52 ug naapil usab ang pag-umangkon nga babaye ni Obsequies nga si Lunithe Deguitos, 38 anyos nga pulos nagpuyo sa maong dapit.
Matud pa ni Korret nga nakuha nila nga ebidensiya gikan sa tulo ka mga suspetsado mao ang tulo ka medium size nga shabu nga mitimbang og 20 gramos nga nagkantidad ang tanan og P136,000.
Si Korret miingon nga kapin na sa napulo ka tuig nga nagnegosyo og illegal nga drugas ang mga dinakpan.
Gani nadakpan na kaniadto si Ortega gumikan sa paghupot og armas nga walay lisensya ug nasulod kini sa National Bilibid Prison niadtong tuig 1990 apan nakagawas kini sa tuig 1995.
Suma pa ni Korret nga gipaubos sa tulo ka semana nga surveillance ang mga dinakpan ug ilang nasuta nga makabaligya kini og 300 ngadto sa 500 gramos nga shabu matag semana.
Gisusi na usab sa kapolisan kun miyembro ba og sindikato sa illegal nga drugas ang maong mga dinakpan. /MEL (BANATNEWS)
- Latest