Mayor Cortes mimando og bag-ong skedyul sa merkado sa Mandaue

CEBU, Philippines — Gimando ni Mayor Jonas Cortes nga buksan gikan Lunes hangtud sa Domingo ang merkado publiko sa Dakbayan sa Mandaue.

Ang maong kamanduan sa Mayor nalatid sa iyang giluwatan nga Executive Order   No.83- niadtong Biyernes September 11, 2020.

Tinguha ni Mayor Cortes nga kapun-an og adlaw ang skedyul sa merkado publiko aron daghan ang makapahimus og masiguro nga makapalit sa ilang mga panginahanglan ang katawhan.

“Considering the recent IATF issuance declaring Mandaue City under Modified General Community Quarantine, there is a need to review or amend the schedule pertaining to the schedule of the Mandaue City Public Market to effectively accommodate the basic needs of the constituents of this city,” nagkanayon   si Mayor Cortes,

Matud pa niya nga kaniadto nga ubos pa sa enhanced community quarantine ang dakbayan gibuksan ang merkado gikan sa Lunes hangtud lang sa adlaw nga Sabado.

Gilugwayan usab ang oras sa merkado nga kaniadto gikan sa alas 5 sa buntag hangtud alas 8 sa gabii karon sa bag-ong skedyul , buksan na kini gikan sa alas 5 sa buntag hangtud na sa alas 10 sa gabii. /MEL (BANATNEWS)