CCPO makig-alayon sa muslim community sa preparasyon sa Sinulog

CEBU, Philippines — Nagtagbo kagahapon si Cebu City Police Office Director Police Colonel Josefino Ligan ug Director Alex Minalang sa National Commission on Muslim Filipino Visayas.

Matud ni Col. Ligan regular visit lang kini ni Director Minalang apan mahimo na kining constant meeting nonot sa tinguha sa kapulisan nga dunay maayong relasyon sa tanang nagkalain-laing sektor sa katilingban.

Kini tungod kay nagsingabot na usab ang pagsaulog sa Sinulog dinhi sa dakbayan diin kaniadto miabag usab ang muslim community.

“Collaboration when it come labi na karon incoming na pud ang Sinulog and previous experience they are providing force multipliers even though na Sinulog is a religious activity nga apart sa ilahang religion and yet they provide force multipliers on their end to help maintain peace sa celebration that is a very good gesture on their part we welcome it”, suma pa ni Col. Ligan. Gihulagway sab ni Col. Ligan nga ang intelligence gathering vital part sab sa ilang pakig-alayon sa muslim community tungod kay bisan unsa nga impormasyon nga makuha nila ipahibawo man nila sa kapulisan aron sab mapugngan ang dili maayong panghitabo o kaha masulbad ang usa ka panghitabo.

Nasayran nga dihang nahitabo ang bombing sa Jolo, Sulu dali sab nga nakig-alayon ang kapulisan sa muslim community aron pagpangayo sa ilang kooperasyon aron masiguro nga malikayan ang susamang insidente ug mapugngan ang mga tawo nga natinguha og motisok og kagubot sa dakbayan.

Kahinumduman sayo ning buwana, ang Police Regional Office -7 sa pagpangu ni Police Brigadier General Albert Ignatius Ferro, mipahigayon usab og dialogue tali sa muslim community leaders gikan sa Mandaue ug Lapu-lapu ingon man sa Cebu Province aron mapalambo pa ang kahapsay ug kalinaw sa rehiyon. Ang maong dialogue miresulta sa pag pinirmahay og manifesto diin ang mga muslim community leaders misaad nga motabang aron mamintinar ang kahapsay ug kalinaw. /MEL (BANATNEWS)