Shabu ug armas nasakmit sa entrapment sa Lapu-Lapu police

CEBU, Philippines — Nasakmit sa mga sakop sa Intelligence Branch (CIB) sa Lapu-Lapu City Police Office ang shabu ug armas atol sa entrapment operation diha sa Barangay Puok, Dakbayan sa Lapu-Lapu niadtong miaging gabii.

Suma pa ni Police Captain Felix Cleopas III ang nangu sa operasyon sa CIB nga duha ka mga tawo usab ang nasikop sa ilang operation. Ang mga nadakpan nailhan nga mao sila si  James Trinidad, 37  anyos nga taga Babag, Dakbayan sa Sugbo ug Gilbert  Dueras, 35 nga taga Doña Rosarion Village sa Barangay Labogon sa Dakbayan sa Mandaue.

Matud pa ni Cleopas nga nakuha gikan sa duha ka dinakpan ang upat ka medium size nga paketeng shabu nga nagkantidad og P68,000  ingon man armas nga kalibre 45 nga adunay pito ka mga bala ug fake nila nga mga identification cards. Ang duha gitanggong na sa Lapu-lapu Police Station samtang giandam pa ang kaso nga ipasaka batok kanila.

Samtang ang kapolisan sa Presinto 3 sa Mandaue City Police Office (MCPO) ang nakasikop usab sa usa ka tawo nga nagdala og shabu. Si Police Major James Conaco ang hepe sa Presinto 3 sa MCPO miila sa ilang nadakpan nga mao si Franci Dome Grapaña, hingkod ang panuigon nga taga Barangay Pusok sa maong dakbayan.

Si Conaco miingon nga ang maong dinakpan daw katahapan ang lihok nga milabay sa gipahimutang nilang checkpoint ug dihang ilang gisita maoy ilang nakuha ang upat ka paketeng shabu nga dala niini. /MEL (BANATNEWS)