Di magsuot og facemask pamultahon sa Cordova

CEBU, Philippines — Multahan na sa lungsod sa Cordova ang si bisan kinsang dili magsul-ob og face shield ug face mask lakip na ang dili mosunod sa social distancing.

Dili momenus P200 hangtod P500 ang ipahamtang nga multa batok sa mga dili mosunod sa Municipal Ordinance No. 2020-52 o ang “Mandatory Wearing of Face Mask, Face Shield and Social Distancing Ordinance of the Municipality of Cordova.”

Sa maong ordinansa ang tanang mga tawo sa lungsod kinahanglang magsuot og facemask ug face shields kun mogawas sa ilang panimalay samtang  duna pay community quarantine.

Ang makalapas multahan og P200 sa first offense, P300 sa second offense ug P500 sa third offense. Usa ka libo ka pesos usab ang multa sa mga presidente, manager, proprietor sa mga establisemento o institusyon sa lungsod nga dili mosunod sa maong ordinansa.

Sa laing bahin, usa ka ordinansahon sab ang giduso  diha sa hunta probinsyal nga nagtinguha pagsilot ang dili magsul-ob og face mask ug patakag labay niini Pamultahon og P2, 000 ug pagkapriso o tulo ka bulan depende sa korte sa unang kalapasan, P3, 000 usab o pagkapriso hangtod unom ka bulan sa second offense ug P5, 000 o pagkapriso og unom ka bulan o pareho depende sa korte sa ikatulo nga paglapas. /IBM (BANATNEWS)