Misa, kompirmasyon taliwala sa pandemiya
CEBU, Philippines — Magpadayon ang mga gikatakdang Santos nga Misa ug Kompirma isip kabahin sa mga kalihukan sa kapistahan sa Parokya sa Santa Rosa de Lima sa Lungsod sa Daanbantayan taliwala sa pandemiya.
Kini magsugod sa Agosto 21 alang sa taga Barangay Tominjao, petsa 22 sa Barangay Malingin, petsa 24 sa Barangay Bitoon, petsa 25 sa Barangay Pajo, petsa 26 sa Barangay Poblacion, ug petsa 27 sa Barangay Agujo nga maoy naglangkub sa parokya. Ang kura paruko nga si Rev. Fr. Reymilo Talaugon ang mopasiugda sa Misa alang sa Kompirmasyon sa alas 9 sa buntag sa maong mga adlaw.
Alas 8 sa buntag sa maong mga adlaw ipahigayon ang seminar/orientation alang sa kompirmasyon.
Gituyo pagbahin ang matag barangay aron makontrolar ang pagtapok sa tawo sulod sa simbahan ug isip usab pagsunod sa lagda sa simbahan ug sa lokal nga pangagamhanan ilawom sa community quarantine.
Limitado ra sab sa tulo ka tawo ang makatambong sa kompirmasyon nga mao ang kompirmahanan, usa ka ginikanan ug usa ka mangugos. Gikasabutan sa Inter-Agency Task Force nga aron matugutan ang mga hingtungdan nga makagawas bisan dili schedule sa ilang barangay clustering, kinahanglan nga mokuha sila og certification gikan sa barangay.
Requirement sa pag-isyu og certification ang resibo gikan sa simbahan nga nagpamatuod sa ilang pagtambong sa kalihukan.
Samtang dunay Santos nga Misa matag alas 6 sa buntag sugod sa Agosto 21, rosary ug novena mass matag alas 4 sa hapon. Limitado ra usab ang makasulod sa simbahan isip pagsunod sa health protocols.
- Latest