Diyotay pa ang mga turista nga nibisita sa Oslob

CEBU, Philippines — Bisan og gibuksan na pagbalik ang whale shark watching diha sa Barangay Tan-awan sa Lungsod sa Oslob menos pa ang mga turista nga nibisita sa lugar.

Gibutyag ni Mayor Jun Tumulak sa Oslob nga anaa ra sa average nga walo ka tawo o bisita ang moanha sa lugar matag adlaw sukad sa pagbukas niini og balik niadtong Agosto 1, 2020.

Hinuon ang LGU naglaom na niini nga sitwasyon sanglit ang pwede lang makasuroy karon mao ang mga taga probinsiya nga karon anaa sa modified general community quarantine ug wala pay labot ang taga Cebu City nga anaa pa sa general community quarantine ang status.

Matud ni Tumulak nga gihan-ay pa usab nila karon pag-ayo ang online booking aron wala nay problema niini inig dagsa og balik sa mga turista diha sa Oslob.

Gibutyag ni Tumulak nga matag Miyerkules sirado ang tourism activity sa lungsod tungod kay sa maong adlaw mao man ang pagpanglimpiyo ug tingpahuway sa mga tourism sites sa lungsod.

Ang ubang destinasyon sa Oslob wala pa kini hingpit nga buksi ngadto sa publiko. /BDB (BANATNEWS)