Mag-uuma patay sa pagpanungab sa Dalaguete

CEBU, Philippines — Patay ang usa ka 35anyos, nga mag-uuma human kini gidunggab  diha sa  Barangay Dumalan, Lungsod sa Dalaguete, alas dies ang takna sa gabii adlaw nga lunes. Ang namatay naila nga si Johnrey Descar, minyo, taga Sitio Canlawilao, sa maong Barangay.

Ang suspetsado mao si Jose Maria Tormellano, 24anyos, dunay kapuyo ug residente sa Sitio Baybayon.

Sa pasiunang imbestigasyon sa kapulisan nasuta nga nitambong ang biktima ug suspetsado sa usa ka birthday apan anaa sa managlahi nga grupo sa panag-inom.

Matud pa ni PCMS Maria Fay Isidro, Desk Officer sa Dalaguete Police Station base sa pangangkon sa suspetsado, giingong nakakita ug kaaway ang lain nga grupo ug nitabang si Tormellano, apan giingong gitulisok kini sa biktima nga niresulta sa pagpanunggab.

Ang biktima nakaangkon ug daghang samad dinunggaban diin dali pa kini nga gidala sa tambalanan apan gideklarar kini nga patay na.

Suway pa unta nisibat ang suspek ngadto sa balay sa iyang ugangan, apan didto gitabangan kini uban sa konsehal nga motahan sa iyang kaugalingon sa kapulisan.

Ang dinakpan nagtingkagol na karon sa bilangguan ug gipaabot ang pagpasang-at ug tukma nga kaso.

Patay sa disgrasya

Patay ang usa ka 47anyos nga lalaki kinsa nagmaneho sa iyang motor human kini nibangga sa nagparking nga sakyanan sa  Barangay Tapilon,  sa Daanbantayan.  Ang biktima giila nga si Erwin Buan, minyo, taga Sitio Sampero, sa maong barangay.

Matud pa ni Police Staff Sergeant Ramon Catubig, Desk Officer sa Daanbantayan Police Station, giingong gikan sa Barangay maya ang biktima ug sa dihang pag-abot niini sa nahisgutang lugar nibangga kini sa nakaparking nga sakyanan.

Ang biktima nakaangkon ug grabeng kadaut sa iyang lawas nga maoy naingnan sa hinanali niini nga kamatayon.

Samtang ang pamilya sa biktima ug ang tag-iya sa sakyanan nagkasinabot nga tubagon ang pagpahiluna sa patay nga lawas sa biktima ug dili nalang sila mopasang-at ug kaso. —/MEL (BANATNEWS)