Upat ka gobernador sa cv magtagbo bahin sa turismo

CEBU, Philippines — Nagkauyon ang upat ka probinsiya sa Central Visayas alang sa inter-island tourism tumong sa pagpabangon pagbalik sa ekonomiya.

Sila si Gobernador Gwendolyn Garcia sa Cebu, Arthur Yap sa Bohol, Roel Degamo sa Negros Oriental ug Zaldy Villa sa Siquijor nagkasabot nga magtagbo karong Agosto 12 sa Siquijor, ang bugtong lalawigan sa Rehiyon 7 nga wala nasudli sa coronavirus disease.

Kini aron pagtuki sa bisan unsang butang mahitungod sa turismo ug pagbukas pagbalik sa ekonomiya sa rehiyon.

Si Garcia ang unang nihatag sa maong sugyot atol sa virtual talk show sa Facebook pages sa Office of the Presidential Assistant for the Visayas (OPAV) ug Department of Trade and Industry sa Central Visayas.

Matud ni Garcia nga labing maayo nga ang upat ka probinsiya sa rehiyon magtinabangay alang sa posibilidad nga buksan ang turismo alang sa mga lokal nga turista.

Si Yap sa iyang bahin nibutyag nga plano nila karon ang “travel bubble” aron pagsuporta sa ilang ekonomiya nga nagsalig sa turismo dugang sa agrikultura.

“If Cebu is dependent on tourism, more so with Bohol. We’re now looking at exploring bilateral agreements in arrivals,” matud ni Yap.

Ang “travel bubbles” mao ang pagpakiglambigit sa kasikbit nga lugar nga dunay parehong lakang nga gihimo sa kalampusan sa pagpakigbatok sa coronavirus disease sa tagsatagsa ka lugar.

Matud ni Garcia nga karon na ang panahon nga buhion ang industriya sa turismo samtang luagan na sunod semana ang quarantine measures sa upat ka probinsiya.

Sugyot ni Garcia nga ang upat ka probinsiya magpareho ang ipatuman nga protocols.

“We will meet so we can discuss on how we can work on these tourism exchange,” matud ni Garcia.

Gipahibawo ni Garcia ang hinay-hinay na nga pagbukas pagbalik sa mga kalihukan sa turismo sa Lalawigan sa Sugbo.

Ang OPAV ang mopasiugda sa maong tigum sa mga gobernador kauban sa DTI, Department of Tourism, Department of Agriculture ug National Economic and Development Authority.