Dokumento sa bag-ong sementeryo gihikay na

CEBU, Philippines — Gitrabaho na sa kagamhanan sa Siyudad sa Sugbo ang mga rekisitos nga gikinahanglan alang sa pagtukod sa Cebu City Memorial Garden sa Sitio Patay’ng Yuta ug Baksan sa Barangay Sapangdaku.

Gibutyag ni Konsehal Dave Tumulak nga apil sa giproseso ang Special Land Use Permit, Environmental Compliance Certificate ug uban pa.

Ang konsehal niingon nga sa higayon nga makompleto na ang tanan ug wala nay mga problema diha na sugdan ang pag-ugmad sa lugar.

Tumong sab niini aron dili na masubli pa ang nahitabo sa Sitio Katives, Barangay Guba diin gipahunong ang development sa lugar kay matud pa walay mga permit ilabi na sa pagputol sa mga punoan sa Mahogany.

Ang kagamhanan sa siyudad maghimo og public cemetery aron pagtubag sa problema sa kapuno na sa kasamtangang sementeryo ug maglisud na og lubong ilabi na niadtong mga nakalas tungod sa coronavirus disease.

“Nagkaproblema gyud, daghan kaayong pamilya intawon sa nangamatyan labi na karong panahon sama sa gihapon nagka problema sila asa ilubong kay ang uban lagi dili maka-afford anang cremation mao nga nagpaabot sila nga mahuman ning atuang gi-propose nga Cebu City Memorial Garden para adto nila ipahimutang ang patay’ng lawas sa COVID victims. So mangayo kog pasaylo, dispensa sa pamilya nga sa pagkakaron nga importante man gud makompleto nato ang tanang dokumento dili pa gyud ta makahimo sa atong development,” dugang sa konsehal.

Gihimug-atan hinoon ni Tumulak nga dili ra maabtan og sunod tuig ang development niini kay kun mahuman na ang tanan masugdan dayun ang proyekto.

Sayo niini si Environment Secretary Roy Cimatu nimando nga minusan ang pagputol sa mga kahoy hinungdan nga ang site development plan mopahaum nalang sa kahoyan nga dili angay putlon. /GMR (BANATNEWS)