Hard lockdowns gilibkas

CEBU, Philippines — Gilibkas na ang hard lockdowns sa mga sitio sa lima ka mga barangay sa Cebu City nga kaniadto adunay daghang mga kaso sa novel coronavirus disease (COVID-19) human kagahapong adlawa nipagawas og resolusyon ang Regional Inter-Agency Task Force(RIATF)-7 for the Management of Emerging Infectious Disease(MEID) niini.

Usa kini ka IATF Resolution No. 11 naglibkas sa hard lockdowns nga gipatuman sa Sitio Zapatera sa Barangay Luz; Sitio Gonzalo sa Barangay Tejero; Sitio Alaska sa Barangay Mambaling, Sitio Callejon sa Barangay Labangon ug sa Barangay Bacayan. Nasayran ang RIATF7-MEID nakadawat og suwat niadtong Hulyo 10, 2020 gikan sa Cebu City Government pinaagi ni City Administrator Atty. Floro Casas kinsa mao sab ang Incident Commander sa Incident Command System sa siyudad nga nag-request sa paglibkas na sa hard lockdowns sa maong mga sitio.

Kini gibasi nila sa resulta sa balidasyon ug pagsubay sa Cebu City Health Department nga nagpakitang nimenus na ang pagtakudtakod sa virus sa maong mga dapit samtang magpadayon gihapon ang pagtutok kanila.

Matud pa ni Atty. Ian Kenneth Lucero, pangulo sa Cebu City DILG ang resolusyon gipirmahan ni DILG-7 Regional Director Leocadio Trovela.

Ang resolusyon sa RIATF-MEID gibasi sab dili lang gikan sa CCHD kondili gitandi kini sa data nga gipresentar sa Police Regional Office-7.

Subay niini, ang tigpamaba ni Mayor Edgardo Labella nga si Atty. Rey Gealon nanghinaot nga bisan og gilibkas na ang hard lockdowns sa maong mga sitio, magpabiling tumanon sa mga residente ang mga health protocols.

“Sama ining atong estado karon nga Enhanced Community Quarantine, magpabilin ang stay at home order pasabot nga kung way gikinahanglang paliton nga pagkaon, tubig, tambal o moadto sa banko magpadala og kwarta pundo palihog magpuyo lang sa inyong tagsa-tagsa ka panimalay. Kun mogawas man gani magmentinar og physical distancing ug ingon man pagsul-on og mask ug sa katapusan ayaw kalimti inyong quarantine passes,” sigon ni Gealon.                      

Mabolo police station

Bukas nasab ang Mabolo Police Station human sa kapin duha ka bulan nga lockdown tungod nagpositibo ang siyam nila ka mga polis lakip na ang hepe niini nga si Police Major Dindo Alaras.

Gipaayo usab ang police station aron pagsunod sa estrikong health protocols ilabi na sa ilang detention cells nga diin gituohang gikan ang virus nga nakatakod sa mga polis.

Si Alaras kinsa naayo na, miingon nga aron masiguro ang kaluwasan sa tanan, sa gawas lang sa ilang buhatan sila modawat og mga modangop kanila.

Si Association of Barangay Captain sa Dakbayan sa Sugbo Ex-Officio Franklyn Ong ang nitabang sa pagpaayo sa detention cell.

Samtang gipahibalo usab ni Cebu City Police Office Director Police Colonel Josefino Ligan nga wala nay police station sa dakbayan nga gipaubos og lockdown.

Gawas ni Alaras, ang hepe sab sa Pardo Police Station nga si Major John Escober nagpositibo sa COVID19 ug naayo na sab. Rowena Capistrano, Sheriza Mae Uy/IBM (BANATNEWS)