Siyudad nihatag og 1,000 ka tuob kits sa PRO-7
CEBU, Philippines — Gihatagan sa kagamhanan sa Dakbayan sa Sugbo ang Police Regional Office 7 og 1,000 ka steam inhalation kits.
Si Konsehal Jerry Guardo ang ni-turnover niini ngadto ni PRO-7 Director Police Brigadier General Albert Ignatius Ferro kagahapon sa buntag.
Giklaro ni Guardo nga wala’y kwarta nga gipagawas ang kagamhanan sa siyudad sa pagpalit sa 1,000 ka steam inhalation kits tungod kay gidonar kini sa iyang higala nga si Ronald Elpa ug Alsa Bisaya nga grupo.
“Ang 1,000 kabuok nga steam inhalation kits that already includes atoang kettle, tualya, planggana ug katong Giong nga vaporizer/inhaler, so kana mao na set niya, this is good for 1,000 kaubok policemen atong matabangan nato, at least to boost their immune system pagbatok sa COVID-19,” matud ni Guardo.
Una na nga nanghatag niini ang siyudad sa Cebu City Police Office ug PRO-7 og tag 50 kabuok steam inhalation kits.
Nasayran sab nga sa mga Barangay Isolation Centers, si Guardo nanghatag sab og steam inhalation kits ug iyang giklaro nga wala kini gibaligya sa siyudad kinsa nigasto sa dul-an P3 milyones. “Ako lang i-clarify sad gipamaligya kuno sa siyudad ang kit which is not true ang katong first nga gihatag sa City nga 1,000 steam inhalation kits ato gyud to gihatag didto sa admitted patients sulod sa Barangay Isolation Center, ang nag-purchase ato ang City unya gipanghatag to sa mga pasyente nga admitted karon sa atong BIC,” pasabot ni Guardo. Samtang niawhag sab siya sa mga doktor nga supak sa steam inhalation nga magtinabangay lang sanglit iyang giklaro nga wala sila moingon nga makaayo kini sa COVID-19 apan ang tuob makatabang aron paglikay nga maigo sa maong sakit samtang wala pay tambal nga nadiskubre. /GMR (BANATNEWS)
- Latest
