Mandaue City Hospital duna nay mortuary freezer van

CEBU, Philippines — Nahatagan na ug kasulbaran ang nasinati nga suliran sa Mandaue City Hospital sa pagpahimutang sa mga namatay nila nga mga pasyente sa COVID-19.

Kini human nakahukom si Mandaue City Mayor Jonas Cortes sa pagpalit ug mortuary freezer van nga maoy temporaryong butangan sa mga pasyente nga mamatay nga nagpaabot pa sa skedyul sa cremation.

Kagahapon sa buntag nidangat na ngadto sa Mandaue City Hospital ang maong kahimanan.

Ang mortuary freezer van gisusi na ni Mayor Cortes kauban ang mga representante sa Departmenf of Health DOH-7.

Mokabat sa  40 ka mga patayng lawas ang mahimong masulod sa maong mortuary freezer diin libre ang paggamit niini sa mga molopyo sa Dakbayan sa Mandaue.

Tinguha ni Mayor Cortes nga mahatagan og libre nga serbisyo ang mga mandauehanon  ilabi na kadtong mga kabus nga pamilya nga way ikagasto sa pagpahiluna sa ilang mga mahal sa kinabuhi nga nabiktima sa coronavirus disease.

Ang paggamit sa susamang kahimanan  sa mga pribado nga tambalanan mogasto ang mga pamilya sa namatay og  P1,000 ngadto  sa P5,000 sa matag  adlaw nga pagamit niini. /MEL (BANATNEWS)