QR code pass gitahas sa barangay

CEBU, Philippines — Gisugdan na kagahapong adlawa ang pagpangapod-apod sa bag-ong Enhanced Community Quarantine (ECQ) QR code pass puli sa gikanselar nga 250 mil ka quarantine passes nga unang giisyu sa siyudad.

Matud ni Cebu City Mayor Edgardo Labella ang mga barangay kapitan sa siyudad sa Sugbo gipangayuan og lista kun pila gyud ka buok ang mga residente sa ilang barangay ug gi-verify ug gi-evaluate kini sa Philippine National Police.

Uban ni Labella sila si PRO-7 Regional Director Brigadier General Albert Ignatius Ferro, Department of Interior and Local Government (DILG) Assistant Secretary Alexander Macario ug Assistant Overseer for Visayas Secretary Melquiades Feliciano mipakita sa bag-ong nawong sa quarantine pass.

Odd-even

Pipila sa mga guidelines sa quarantine pass mao nga panahon sa ECQ ang tanang tawo kinahanglang anaa ra sulod sa balay sa tanang panahon.

Ang kalihukan gawas sa pinuy-anan limitado ra ngadto sa pagpalit og pagkaon, tambal, o medisina ug ubang mahinungdanon nga panginahanglan.

Usa ka quarantine pass matag balay para sa pagpalit og pagkaon, tambal o medisina.

Magamit lang kini sugod sa alas 6 sa buntag hangtod sa alas 8 sa gabii ug

dunay katapusang numero nga odd sama sa 1,3,5,7 ug 9 makagawas sa Lunes, Miyerkules ug Biyernes samtamg ang QR code nga even number ang katapusan sama sa 0,2,4,6,8 makagawas Martes, Huwebes ug Sabado. Way  makagawas sa adlaw nga Domingo.

Kinahanglan sab magsul-ob og face mask ang mga mogawas sa balay ug mosunod gihapon sa social distancing.

Ang quarantine pass dunay ngalan, sitio ug barangay ug naa sab didto ang contact numbers sa mga Cebu City Cluster Clinics.

Di mapahuwaman

Matud ni Labella, ang gibasehan sa quarantine pass kadtong lista gikan sa mga barangay kapitan apan ilaha kining gi-verify sa data base sa Department of Health(DOH)-7.

Base sa nakita sa data base sa DOH, moabot sa 178,000 quarantine pass ang ihatag, tagsa kada household.

Kun kinsang ngalan ang nakasuwat sa quarantine pass mao ray makagawas ug dili pwede mapasa-pasa sa laing miyembro sa pamilya.

Ang Philippine National Police maoy mo-distribute sa quarantine passes pinaagi sab sa pakig-alayon sa mga barangay officials.

Apor

Sa pikas bahin, si Labella  miingon nga kun kinsa kadtong mga tawong apil sa mga authorized persons outside of residence (APOR) nga dakpon tungod sa pasangil nga nakalapas sa ECQ policies mahimong modangop sa iyang buhatan aron moreklamo.

Si Labella  nakadawat og mga reports nga dunay mga APOR nga gipangdakop sama sa mga vendors gikan sa public market nga padung na manguli sa ilang balay, mga BPO workers ug grocery clerks bisan kon sila sa exempted sa stay home policy.

Ang mayor miawhag sa mga biktima sa pagtaho sa iyang buhatan kay bisan og giestrikto ang ECQ kinahanglang makiangayon ang mga nagbantay.

Gidasig ni Labella ang katawhan nga magpabalin sa ilang balay ug dili mogawas kung dili sila naapil sa APOR.

Augmentation

Gipahibalo ni Police Regional Office (PRO)-7 Regional Director Police Brigadier General Albert Ignatius Ferro dul-an usa ka libo ka mga polis ang gidugang dinhi sa Siyudad sa Sugbo aron motabang sa pagpatuman sa health ug safety protocols.

Gikan ang maong mga polis sa Police Regional Office(PRO)-6, Police Regional Office(PRO)-8, Special Action Force ug gikan sa ubang police offices sa Central Visayas.

Ang Cebu City adunay  dos mil ka polis karon, ang 1,032 niini gikan  sa CCPO apan ang 168 niini nag-stay at home tungod kay mabdos ug ang uban dunay gipamati sa       lawas.

Ang SAF i-deloy sa hard lockdown areas aron wala’y pabor-pabor nga mahitabo tungod kay kaila sa mga polis ang mga residenteng gibantayan dunay uban nga tugutang makagawas.

Aduna say surveillance drones nga maniid sa kahanginan aron mabantayan kadtong wala mopatuo sa protocols. Rowena Capistrano/IBM (BANATNEWS)