Polis patay sa aksidente sa motor
CEBU, Philippines — Patay ang usa ka polis human madisgrasya sakay sa iyang motor sa Barangay Tagba-o Dakbayan sa Sugbo kagahapon sa buntag.
Giila ang polis nga namatay nga si Police Staff Sergeant Alex Cubilo operation sa Talamban Police Station.
Matud ni Police Captain Jonathan Bethoveen Taneo hepe sa Talamban Police Station nga paingon na unta nga mobalik sa iyang pwesto si Cubilo human sa ilang meeting alang sa tanan nga mga Quarantine Control Point (QCP) ubos Talamban Police Station.
Dugang pa ni Taneo nga gipatawag niya ang meeting sa tanang leader alang sa paghatag og instruction sa mga lakang nga buhaton sa QCP.
Segun sa report naka agi ug lapokon nga karsada nga dunay lawom nga parte si Cubilo hinungdan sa pagkahagbong sa motor ug napantok ang ulo niini sa karsada.
Nadala pa sa pribadong tambalanan sa Barangay San Jose Dakbayan sa Sugbo ang biktima apan human sa 30 minutos nga pagtabang sa mga doctor gideklarar kini nga patay na. Grabeng samad ug bun-og sa ulo ang na-angkon ni Cubilo nga maoy hinungdan sa iyang kamatayon.
Samtang gisiguro sab sa kapolisan nga mahatagan sa tukmang benepisyo ang pamilya sa biktima kinsa nagserbisyo sa kapollisan sulod na sa napo ka tuig. /MEL (BANATNEWS)
- Latest