Laing ayuda ipanghatag sa Dakbayan sa Talisay

CEBU, Philippines — Gisugdan na usab ang pagpanghatag sa ikaduhang hugna sa ayuda gikan sa Dakbayan sa Talisay.

Suma pa ni Mayor Gerald Anthony “Samsam” Gullas Jr. nga ang laing tag 25 ka kilo nga  bugas humay hinay hinay na nilang ipanghatag sa mga molopyo sa dakbayan.

Kini segun usab sa iyang naunang saad nga makadawat gihapon ang mga molopyo sa ayuda ug way pili ang pagpanghatag niini bisan ug konkreto ang mga panimay makadawat gihapon ug hinabang.

Hinoon giklaro ni Mayor Gullas nga matag pamilya lang ang matagaan sa bugas ug kadtong ulitawo o nag-abang sa syudad bahinon kini ngadto sa laing nag-inusara sa pagpuyo.

Pipila sa mga barangay sa syudad ang nakasugod na sa pagpanghatag apan duna pay uban nga nagpaabot pa.

Gihangyo lang sa mayor ang katawhan sa Talisay nga mohatag ug gamay nga pasensya ilabi na kadtong malangay sa pagdawat sa dugang hinabang tungod kay dili usab sayon   ang pagdiskarga sa mga sinakong bugas. /MEL (BANATNEWS)