Konseho sa Mandaue mihangyo nga paangkasan ang motorsiklo
CEBU, Philippines — Gipalabang sa konseho sa Dakbayan sa Mandaue ang resolusyon nga naghangyo sa Inter-Agency Task Force nga tugotan ang pagpaangkas sa motorsiklo basta sakop sa pamilya.
Si Konsehal Carmelino Del Mar Jr. nga maoy chairman sa committee on labor trade and industry sa konseho sa maong dakbayan maoy nangamahan sa maong resolusyon.
Matud pa niya dihang nahinabi sa mga tigbalita nga nakadawat na usab sila og daghang reklamo labot sa pagpaangkas sa motorsiklo
Nakasabot siya nga lagda nga gilatid sa IATF mao gayod ang tumanon apan iyang gipanghinaut nga mohimo og mga kausaban niini bahin niini.
Sa unang adlaw sa pagpaubos sa general community quarantine sa Mandaue City ug mga lugar sa Sugbo nangabli na sab ang mga establisamento hinungdan nga namalik na ang mga trabahante.
Apan daghan kanila ang naglisud sa pagsakay tungod sa kakulangon sa mga nagdagang sakyanan nga ilang masakyan padung sa trabahoan.
Sa pikas bahin, ang dakbayan nipadagan sa ilang mga bus aron masakyan sa mga pasaherong nangatanggong sa kadalanan tungod sa kanihit sa mga nagdagang bus ug modern-jeepneys.
Si Mandaue City’s Traffic Enforcement Agency of Mandaue (TEAM) executive director, Atty. Jamaal Calipayan nga nahinabi sa mga tigbalita miingon maayo ra ang unang adlaw sa GCQ bisan pa man ilang nasayran nga 40 lang ka mga bus ug modern-PUJs ang nakadagan gikan sa gisaad nga 120 ka units. Dugang pa niya nga mohimo pa og mga kausaban aron mamenusan ang kahasol sa mga sumasakay.
Samtang si Police Colonel Jonathan Abella Mandaue City Police Office (MCPO) chief miingon nga ang unang adlaw sa GCQ malinawon ug hapsay ang pagsulod og gawas sa mga sakyanan sa kadalanan sa dakbayan.
Gipahiluna gihapon ang checkpoints sa mga border ug base sa ilang monitoring moderate to heavy traffic ang dagan sa mga sakyanan. /IBM (BANATNEWS)
- Latest