P2.3 milyong shabu nasakmit gikan sa babaye
CEBU, Philippines — Mokabat ngadto sa P2.3 milyones nga gidudahang shabu ang nasakmit sa Cebu City Police Office (CCPO) atol sa gipahigayon nga buybust operation sa Sitio Bliss, dan A. Lopez sa Barangay Labangon sa Dakbayan sa Sugbo.
Giila ang dinakpan nga si Ma. Joe-Ann Juezan Cabornay, 23, taga Sitio Sto. Nino Banawa sa Barangay Guadalupe ning dakbayan.
Matud ni CCPO City Intelligence Branch CIB Chief Police Major Randy Caballes nga niadtong tuig 2017 nadakpan na si Cabornay sa paghupot sa illegal nga drugas apan pagka 2019 nakagawas ra kini human nakabenepisyo sa plea bargaining agreement.
Giingong tibuok dakbayan sa Sugbo ang area of distribution ni Cabornay diin makabaligya kini og 500 gramos ngadto sa usa ka kilong shabu matag semana.
“Whole Cebu City gyud siya kay ang distribution niya 500 to 1 kilo man a week then different areas man bisag asa lang ang manguha pwede as long as iyang mga trusted,” matud pa ni Caballes bahin sa maong suspek kinsa usa ka semana nilang gipanid-an.
Gibutyag sab ni Caballes nga adunay contact sa sulod sa Cebu City Jail ang suspek nga maoy mopahatud kaniya sa illegal nga drugas. Nagpatabang na sila sa Bureau of Jail Management and Penology (BJMP) bahin niini.
Mokabat 350 gramos ang nakuha gikan ni Cabornay kinsa kasohan og paglapas sa Republic Act 9165. /IBM (BANATNEWS)
- Latest