Opisyales sa SK sa Cordova maoy paedukahon sa mga batan-on

CEBU, Philippines — Ang mayor sa Lungsod sa Cordova Mary Therese Sitoy-Cho niawhag ngadto sa mga chairman sa Sangguniang Kabataan (SK) sa lungsod nga motabang pagpasabot sa mga batan-on hilabina ang mga 21-anyos paubos nga walay trabaho nga magpuyo sa ilang tagsa-tagsa ka panimalay.

Base sa Municipality of Cordova facebook page, si Cho nakigtigom sa mga SK chairman niadtong Mayo 28, 2020 diin nipadayag kini sa  iyang pagkaalarma  sa gidaghanon sa mga batan-on nga nilapas sa quarantine restrictions.

Gilakbit ni Cho ngadto sa mga batan-ong lider nga ubos Section 2.10 sa Executive Order 17 ni Gobernador Gwendolyn Garcia ang 21-anyos paubos gawas lang sa mga nagtrabaho sa mga establisimento ang home quarantine kini sulod sa 24 oras.

“Please help us inform the young Cordovanhons, ages 21-years and below and wala pa nanarbaho that they are on a 24-hour home quarantine. Ask them to cooperate to contain the spread of covid-19”, tipik sa post sa official facebook page sa Cordova.

Si Cho nagkanayon nga kinahanglang ang mga lider sa SK maoy mo edukar ug mopasabot sa mga kabatan-onan sa ilang barangay kalabot sa covid-19 pandemic nga giatubang karon ug ang risgo niini.

“It seems that they are taking this matter lightly maybe because these young violators are not aware of the risk. Nagtu-o guro sila abi nag-GCQ na ta, safe na gyud ug everbody can already go out from their respective homes. If wala pay vaccine, di pa gyud safe”, laing tipik sa post sa facebook page sa lungsod.

Dugang ni Cho nga bisan og ubos na sa general community quarantine ang Cordova limitado gihapon ang paggawas alang sa pagpalit sa mga essential goods ug wala gihapon itugot ang pagsuroy-suroy. /BDB (BANATNEWS)