Senior citizens pasudlon sa mga establisamento sa Daanbantayan

CEBU, Philippines — Giawhag ni Mayor Sun Shimura sa Lungsod sa Daanbantayan ang mga business establishment sa lungsod nga tugotan nga makasulod sa ilang mga establisemento ang mga senior citizen.

Sa iyang memorandum nga adunay petsa nga Mayo 27, 2020,  si Shimura nagkanayon nga ubos sa Executive Order No. 17 ni Gobernador Gwendolyn Garcia ang  21-anyos paubos ug kadtong mga adunay pre-existing medical condition ang ipaubos sa 24 oras nga home quarantine.

“This provision stipulates that senior citizens are not included in the 24-hour quarantine hence they should not be denied entry in your establishment”, tipik sa memorandum ni Shimura alang sa tanang mainland business establishment sa lungsod nga gi-post diha sa facebook page sa lungsod.

Si Shimura nagkanayon nga niabot ngadto sa iyang buhatan nga adunay mga establisemento sa lungsod nga dili mopasulod og mga senior citizen.

Giklaro ni Shimura nga angay ra pasudlon ang mga senior o katong mga 60-anyos pataas sa mga establishemento aron pagpalit og essential goods ug mo-avail services.

“Nonetheless, they are still subject to the existing guidelines and protocols, including the schedule of baranggay clustering and wearing of face masks”, laing tipik sa maong memorandum.  /BDB (BANATNEWS)