COVID-19 update: Cebu City may bag-ong 96 kaso sa COVID-19
CEBU, Philippines — Miabot sa 96 ka mga bag-ong kaso sa coronavirus disease(COVID)-2019 ang nadugang sa Siyudad sa Sugbo base sa gipagawas nga datos sa Cebu City Health Department kagahapong adlawa.
Ang mga bag-ong kaso mao kini: tagsa ka kaso sa Barangay Lahug, Barangay Tejero, Sawang Calero, Camputhaw, Guadalupe , Mabolo, Calamba, Cebu City Jail, Labangon, Lorega, Day-as, Inayawan, Suba, Ermita, ug Tisa.
Samtang tagduha sab ka kaso sa Labangon, Basak San Nicolas, walo sa Barangay Duljo Fatima, upat sa Barangay Punta Princesa, 16 ka kaso sa Barangay Tinago, 21 ka kaso sa Barangay Pardo, 12 ka kaso sa Pasil, 9 sa Basak Pardo, tulo ka kaso sa Sambag 2, duha sa Bulacao, ug duha sa Mambaling.
Base sab sa datos CCHD dunay laing batch sa recoveries nga moabot sa 56. Duha niini gikan sa Punta Princesa, 20 sa Alaska Mambaling ug 34 sa Labangon.
Moabot sa 32 ang bag-ong nagpositibo sa COVID-19 base sa gipagawas nga resulta sa swab test sa lukop isla sa Sugbo kagahapong adlawa Mayo 26, 2020.
Sa iyang virtual presser si Governor Gwendolyn Garcia nagkanayon nga gikan kini sa 445 ka swabs nga gi-test sa Vicente Sotto Memorial Medical Center Sub-National Laboratory (VSMMC SNL) kon diin 413 ang negatibo sa COVID-19.
Si Garcia nagkanayon nga ang swabs nga nakuha gikan sa Cebu Province (68), Cebu City (334), Lapu-Lapu City (16) ug Mandaue (27).
Sa mga positibo nga kaso, tulo niini gikan sa Probinsya sa Sugbo. Ang usa taga Malabuyoc nga lalaki nga nag edad og 59-anyos nga dialysis patient apan matud sa gobernador nag-estar na kini sa Dakbayan sa Sugbo niadto pang Abril 23 ug namatay niadtong Mayo 23.
Ang laing bag-ong kaso sa Probinsya sa Sugbo, taga San Fernando kini. Usa ka 39-anyos nga lalaking inmate samtang ang usa, 46 anyos nga taga Dakbayan sa Talisay sumala ni Garcia.
Sa pagkakaron ang running total sa kaso sa COVID-19 sa tibuok isla sa Sugbo moabot na sa 2, 522, ang 126 niini sa Cebu Province, 2, 081 sa Cebu City, 85 sa Lapu-Lapu City ug 230 sa Mandaue. Le Phyllis F. Antojado/IBM (BANATNEWS)
Related video:
- Latest
