DOH mosusi sa bag-ong nanganak nga COVID-19
CEBU, Philippines — Mohimo og imbestigasyon ang Department of Health kalabot sa upat ka bag-ong nanganak nga mga inahan nga nagpositibo sa coronavirus disease.
Si Dr. Jaime Bernadas, regional director sa DOH-Central Visayas, nagkanayon nga mangayo siya og report gikan sa Talisay District Hospital kalabot sa kaso niadtong mga bag-ong nanganak nga didto na-admit sa maong tambalanan.
“Ato nang tan-awon ang circumstances unsay nahitabo, kanus-a na diagnose nga naay Covid, kanus-a gi-swab nga naay Covid, unya nganong gibutang sa ilang diagnosis nga Covid nga nanganak ra man," matud ni Bernadas.
Sumala sa regional director nga base sa protocols, kuhaan og swab test ang kadtong adunay sintomas.
Niadtong Mayo 18, si Gobernador Gwendolyn Garcia nagkanayon nga sa 10 ka kaso sa Covid-19 sa Probinsiya sa Sugbo, upat niini ang bag-ong nanganak nga taga Samboan, Badian, Liloan ug Talisay City.
Gawas sa taga Liloan, ang tulo na-admit sa Talisay District Hospital ug gikuhaan og swab.
“Ato pud na himuon nga case investigation kay lagi wa man evidence nga ma-transmit na siya sa mother to fetus o intra-utero. Walay evidence ana og walay study nag-indicate nga mapasa na didto sa sabakan,” sumala ni Bernadas.
Sa report sa Sugbo News, ang news outlet sa Probinsiya sa Sugbo, si Bernadas nagkanayon nga ang mokaon pa og oras una pa mo-penetrate ang virus sa lawas sa tawo ug mokatap aron ma-detect sa PCR test. /GMR (BANATNEWS)
- Latest
