289 ka mag-uuma nakadawat og tag P25 mil nga hinabang

CEBU, Philippines — Nikabat ngadto sa 289 ka mag-uuma sa Dakbayan sa Sugbo ang nakadawat og P25,000 matag usa kanila gikan sa Department of Agriculture kagahapon sa buntag.

Matud ni Cebu City Agriculturist Joelito Baclayon nga ang paghatag og P25,000 isip tabang sa mga mag-uuma usa kini ka programa ubos sa Sure-aid COVID-19 sa Agricultural Credit Policy Council sa DA.

Matud ni Baclayon ang mga qualified farmer mao kadtong naa sa Registry System for Basic Sector and Agriculture nga gihimo sugod niadtong buwan sa Enero niining tuiga diin kasagaran sa mga mag-uuma sa barangay na-enrolled niini.

Ang maong P25,000 nga ayuda bayaran sa mga mag-uuma nga nakadawat niini sulod sa napulo ka tuig ug zero interest ug depende usab sa mag-uuma sa pamaagi sa ilang pagbayad.

Gihulagway ni Baclayon nga dako na kini og tabang sa mga mag-uuma ilabi na karon nga nakasinati sila og huwaw diin apektado ang ilang mga pananom.

Gawas niini, apektado usab sila sa covid-19 pandemic diin daghan sa ilang mga baligya ang wala mahalin.

Nasayran nga ang DA maoy naghatag og pundo alang sa mga mag-uuma ug gipaagi kini sa People’s Cooperative ug LAMAC Multi-purpose Cooperative ug ang kagamhanan sa siyudad maoy nirekomendar sa mga qualified farmer ubos sa ilang registry system. /BDB (BANATNEWS)