San Nicolas Police Station gi-quarantine

CEBU, Philippines — Nagpatabang ang Police Regional Office 7 sa Armadong Kusog sa Nasud alang sa dugang pwersa nga ibutang sa Police Station 6 sa Cebu City Police Office nga karon gipaubos tanan ang mga sakop sa isolation tungod kay duha sa ilang mga dinakpan ang positibo sa coronavirus disease (COVID-19).

Matud ni PRO7 Regional Director Police Brigadier General Albert Ferro nga mangayo sila og tabang sa Central Command aron sa pagbantay sa hurisdiksyon ubos sa Police Station 6 ilabi na ang Barangay Suba ug Pasil nga maoy usa sa grabing napaektohan sa COVID.

Dugang pa ni Ferro nga maapektohan ang ilang hugot nga pagbantay aron masunod gyud ang enhanced community quarantine sa maong mga barangay nga ubos sa Police Station 6.

“Well, it will really weaken our force in trying to enforce the ECQ, however we have our contingency we are using our reserve force at the region and I have ask the help of the Armed Forces of the Task Force Cebu, Bohol, Siquijor of the Philippine Army to augment and reinforce our QCPs (quick response personnel) and our different checkpoints in the area,” matud pa ni Ferro.

Si Army Colonel Jerry Borja Hepe sa Task Force Cebu Bohol Siquijor mibutyag nga mosuporta sila sa panawagan ni Ferro.

Kalabot usab sa mga polis sa Station 6, si Ferro miingon nga bisan gipang isolate ang maong mga polis magpadayon ang ilang trabaho sama sa paghatag ug report sa ilang buhatan apan gidili kanila ang pag- roving sa gawas. Gahapon usab adlawa gipaubos og swab testing ang kapin 50 ka personnel sa Police Station 6. /IBM (BANATNEWS)