20 mil ka punoan sa marijuana, mga armas ug granada sakmit

CEBU, Philippines — Nikabat ngadto sa P8 milyones nga balor sa marijuana ang nalarot sa mga sakop sa Toledo Police Station, Philippine Drug Enforcement Agency (PDEA)-7, 1st ug 2nd Provincial Mobile Force Company, Provincial Intelligence Branch ug Provincial Drug Enforcement Unit niadtong Miyerkules sa buntag diha sa Barangay Pangamihan, Dakbayan sa Toledo.

Gawas sa marijuana nasakmit usab sa kapolisan ang mga armas ug  granada.

Nasikop sa maong operasyon si Jennelyn Cabiles, 25-anyos, mag-uuma ug residente sa maong lugar samtang ang tulo ka kauban niini ang nakaeskapo.

Atol sa maong operasyon 20 mil ka punoan sa marijuana nga nikantidad og P8 milyones laing pinauga nga marijuana, usa ka kalibre .45 nga pistola nga adunay duha ka magazine ug 12 ka buhing bala, usa ka kalibre .38 nga revolver, usa ka KG9 ug duha ka hand grenades.

Matud ni Police Lieutenant Colonel Janette Rafter, hepe sa Toledo City Police Station nga ang hiniusa nila nga operasyon gihimo human sila nakadawat og impormasyon  kabahin sa pagpananom og marijuana diha sa lugar.

Ang suspetsado natingkagol karon diha sa detention cell sa Toledo Police Station ug gikatakdang pasakaan og tukmang kaso sa nahimo niining kalapasan. /BDB (BANATNEWS)