Mandaue niawhag nga magmugna og laing testing lab

CEBU, Philippines — Giawhag sa kagamhanan sa Dakbayan sa Mandaue ang buhatan  sa Department of Health (DOH) ug ang mga sakop  sa Inter-Agency Task Force  for the Management of Emerging Infectious Disease (IATF- EID) sa  pagmugna og lain pa nga testing laboratory sa coronavirus disease (covid-19) dinhi sa Sugbo.

Ang Eversly Child Sanitarium General Hospital nga nahimutang diha sa Barangay Jagobiao, Dakbayan sa Mandaue nga gipadagan sa DOH ang gitinguha sa siyudad nga mabutangan sa ikaduhang testing laboratory.

Si Konsehal Jimmy Lumapas, vice chairman sa committee on health sa konseho sa siyudad sa giduso niining resolusyon nipasabot nga base sa Executive Order No. 67 series of 2020 o pagpatuman sa enhanced community quarantine niadtong Marso 30, 2020. Kini gihimo isip kabahin sa mga pamaagi alang sa pagpugong nga mokuyanap ang covid-19.

Matud ni Lumapas nga ang Sugbo nagbaton lang og usa ka testing laboratory diha  sa Vicente Sotto Memorial Medical Center sa Dakbayan  sa Sugbo.

Nunot niini, si Lumapas nisugyot usab sa pagpadala og kopya ngadto sa buhatan ni Mayor Jonas Cortes sa gipalabang nilang resolusyon ug ingon man ngadto sa buhatan sa direktor sa DOH-7 Dr. Jaime Bernadas ug sa mga sakop  sa (IATF-EID) alang sa procedural review ug dinaliang aksiyon nga ilang pagahimuon. /BDB (BANATNEWS)