COVID-19 update: Bakuna ray solusyon
CEBU, Philippines — Walo ka mga swabs ang positibo sa coronavirus COVID-19 sa tibuok Sugbo base sa nigawas nga test kagahapong adlawa sa Vicente Sotto Memorial Medical Center Sub-National Laboratory (VSMMC SNL).
Sa 99 ka swabs, ang 24 niini gikan sa Probinsya sa Sugbo, 52 sa Cebu City, 13 sa Mandaue City ug 10 Lapu-Lapu City.
Matud ni Gobernador Gwendolyn Garcia ang walo nga nagpositibo ang unom niini gikan sa Dakbayan sa Sugbo ug duha ang sa Lapu-Lapu City apan ang usa niini repeat test na.
Ang mga hospitals sa probinsya adunay usa nga adunay Severe Acute Respiratory Infection (SARI) nga namatay samtang usa ang na admit. Usa sab ang dunay Influenza Like Illnesses (ILI) nga admitted samtang 32 ang gi -home isolation. Sa mga Persons Under Monitoring (PUMs), 9, 371 na lang ang nahabilin samtang 41, 576 ang nakahuman na sa 14 ka adlaw nga home quarantine. Si Garcia nidayeg sa gihimo sa mga mayor pagmonitor sa ilang mga residente apan sa gihapon nipasidaan siya nga dili mokompyansa.
291 nadugang
Sa pikas bahin, dunay nadugang nga 291 ka positibo sa COVID-19 sa tibuok nasud ug miabot na kini karon og 5,223 sumala pa sa Department of Health bulletin kagahapong adlawa.
Miabot na sab og 335 ang nakalas human nadugang ang 20 ka mga namatay. Hinuon record-high ang 53 ka mga pasyenteng nangaayo ug naabot na tanan og 295.
Sumala pa sa DOH posibleng dunay daghang mga pasyenteng dili grabe ang sintomas nga nangaayo ra diha sa balay nga wala maapil sa talaan tungod kay ang naa sa listahan kadto rang mga nadala sa tambalanan.
Gisugdan kagahapong adlawa ang expanded COVID-19 testing ug apilon na sa pag-test kadtong dunay mga grabeng trangkaso, mga tiguwang, masakiton, mabdos ug healthcare workers nga dunay mga sintomas.
Bakuna
Ang World Health Organization miingon nga kanapuloon ka pilo nga makapatay ang COVID-19 kun itandi sa 2009 flu pandemic o ‘swine flu (H1N1).’
Sumala pa sa WHO ang H1N1 gideklarar nga pandemic niadtong Hunyo 2009 ug natapos niadtong Agusto 2010 ug nakapatay og 18,500 ka tawo tibuok kalibotan. Si WHO chief Tedros Adhanom Ghebreyesus miingon: “control measures must be lifted slowly and with control. Ultimately, the development and delivery of safe and effective vaccine will be needed to fully interrupt transmission,” matud niya.
Apan molanat pa og 12 hangtud 18 ka buwan ang pagpangita sa bakuna. Sa pagkakaron, duna nay 1.9 million ang nataptan niini ug miabot na og 119 mil ang nakalas sa tibuok kalibotan. Philstar.Com/IBM (BANATNEWS)
Related video:
- Latest
