COVID19 update: Way pa senyales nga nilurang

CEBU, Philippines — Wa pay nakitang senyales ang Inter-agency Task Force on Emerging Infectious Diseases nga nihinay na ang pagpanakod sa coronavirus (COVID-19 human kagahapong adlawa gipahibalo sa Department of Health (DOH) nga adunay nadugang nga bag-ong 152 ka kompirmadong natakboyan niini dinhi sa nasud. Tungod niini miabot na og 3,246 ang natakdan, 152 ang namatay ug 64 pa ang nangaayo.

Tungod sab niini, ang task force pabiling opsyon ang pagpadayon sa kasamtang enhanced community quarantine sa Luzon apan wala pay desisyon kun buhaton kini.

Si Cabinet Secretary ug IATF spokesperson Karlo Nograles sa online media briefing niadtong Sabado nagkanayon nga ang paghunong ug paglugway sa ECQ mag-agad sa sukaranan nga ilang gibasehan:

Kini mao ang trend o dagan sa epidemiological curve sa virus apil niini ang pagdaghan ug pagmenus sa gidaghanon sa mga bag-ong natakboyan; kapasidad sa  kasamtangang health system apil na niini ang gidaghanon sa quarantine, isolation ug treatment facilities, kapabilidad sa pagsubay sa mga nakauban sa nagpositibo, gidaghanon sa PPEs sa frontliners ug testing capacity sa nasud; social factors; economic factors ug security factors. Hinuon ang DOH miingon nga ang pagsaka sa gidaghanon sa natakboyan resulta kini sa nagkapaspas ug nagkadaghang laboratoryo tibuok nasud nga makapahigayon og COVID-19 test.

Sumala pa sa Worldometers, 1,201,767 na ang nataptan niini ug 64,710 ang namatay tibuok kalibotan. /IBM