‘Battle of Tres de Abril’ gisaulog
CEBU, Philippines — Gihandum kagahapon ang ika-122 nga “Battle of Tres de Abril” bisan kanselado ang mga kalihukan.
Ang barangay kapitan sa San Nicolas Proper nga si Clifford Jude Niñal uban sa pipila niya ka kaubanan ang nihalad og kandila ug buwak sa marker sa Battle of Tres de Abril uban sa paglitok sa pipila ka pulong sa pag-ampo.
Ang kapitan nipadayag nga ang kaisog sa mga bayani maoy mithi aron lab-ason sa pagpakigbatok sa mga kagaw nga madaug-daugon.
Ang Cultural and Historical Affairs Commission sa Dakbayan sa Sugbo uban sa pangulo niini nga si Bryner Laurito Diaz ang niapil sa pagyukbo sa mga Katipunero mga nialsa niadtong Abril 3, 1898.
Si Laurito mapasalamaton kang Niñal ug mga sakop niini sa paghatag og pasidungog sa mga Sugbuanong Katipunero nga nialsa 122 ka tuig na ang nilabay.
Gitug-an ni Laurito nga ang nagdilaab nga gugma sa kagawasan sa nasud maoy angay panaminan sa katawhan. /GMR (BANATNEWS)
- Latest