Lapu-Lapu dunay COVID hotline

CEBU, Philippines — Gipasalig ni Lapu-Lapu City Mayor Junard “Ahong” Chan nga bukas ang customer hotline sa siyudad nga motubag sa mga pangutana sa mga tawo may kalabutan sa gipatuman nga Enhanced Community Quarantine (ECQ).

Awhag sa mayor sa mga tawo nga dili magduha-duha sa pagtawag kung adunay kalibog ug problema sa gipatuman nga ECQ pinaagi sa numero 09321041164; 09164416690 ug 09167040391.

Sumala pa ni Chan nga adunay mga staff nga motubag sa mga tawag sa customer hotline ug 24 oras kining bukas.

Ang customer hotline nakatala na og dul-an sa 3,000 ka tawag may kalabutan sa gipatuman nga ECQ.

Gipahibawo usab ni Chan nga adunay mga bus alang sa tanan nga buot mangompra ug motrabaho sa pagpakita lang sa ilang mga home quarantine pass ug ID sa ilang mga trabaho.

BUGAS IPANGHATAG

Samtang gitinguha ni Chan ang pagpanghatag og 25 kilos nga bugas ngadto sa labing kabus nga mga molupyo nga residente nga naepektuhan sa ECQ.

Kini naglakip sa mga trisikad drivers, boatmen, hotel employees, mga nagtrabaho sa beauty parlors ug massage spa.

Ang kagamhanan sa dakbayan ang nakapanghatag na og mga food packs sa 11 ka barangay sa Isla sa Olango.

Ang unang hugna nga nahatagan mao kadtong mga kawani sa industriya sa turismo tungod sa pagkunhod sa mga turista.

Kapin sa 8,000 ka nagtrabaho sa tourism sector ang nakabenepisyo sa unang hugna sa hinabang nga naglakip sa 10,000 ka sakong bugas alang sa 100,000 ka pamilya.

Niining semanaha maoy ilang giandam ang laing hugna nga pagpanghatag og bugas nga tag napulo ka kilo sa matag panimalay sa dakbayan.

Gawas sa mga bus, ang kagamhanan sa siyudad magpabiyahe sab og mga pumpboat sa mga isla. Romeo T. Limpangog/GMR (BANATNEWS)