Abogado gidakop tungod sa post
CEBU, Philippines — Usa ka abogado ang gidakop sa kapolisan niadtong adlaw nga Biyernes tungod sa alegasyon nga nag-post kini sa mga pangalan sa mga pasyente sa COVID-19 nga usa ka kalapasan sa Data Privacy Act. Ang abogadong gidakop mao si Rommel Rosito. Gidakop kini diha sa Fairview Hills, Brgy. Basak Pardo, Cebu City.
Ang nidakop kaniya mga sakop sa Police Regional Office (PRO-7) Regional Intelligence Division (RID)-7 uban sa pakigalayon sab sa Department of Health (DOH)-7.
Matud pa nga nakalapas ang suspek sa Section 6 sa R.A 11332 o Mandatory Reporting of Notifiable Diseases and Events of Public Health Concern Act, Data Privacy Act of 2012 and Cyber Crime Prevention Act of 2012.
Si Rosito sa iyang bahin mipasabot sa mga tigbalita nga gi-post niya ang maong impormasyon nga nadawat sa ilang group chat nga nagpasidaan kanila nga likayan ang maong mga tawo sa listahan nga naglakip sa ilang tagsa-tagsa ka mga address ug kun asa sila giingong gi-admit.
Matud pang Rosito ang mensahe nga ilang nadawat niadtong Marso 26 nag-ingon: ‘Iwasan mo kasi sabi ng Doctor.’ Matud niya kasaligan ang tinubdan sa maong impormasyon.
“So ang nahitabo , naa say nangutana sa amoa, because it was sent to our group chat, so I was thinking about the importance of life rather than just the protection of the 7 people if it were through,” pasabot pang Rosito.
Andam hinuon si Rosito nga atubangon ang kasong gipasaka batok kaniya, apan wala siya magmahay kay ang iyang tumong mao ra gyud ang pagpahibalo sa kadaghanan sa angay nilang likayan.
“If they wouldn’t know about this, they will be just in a guessing game, they wouldn’t know who to avoid,” matud niya. “Because if everyone is fully informed then they would know who to avoid, and I was thinking you should know the person because how would you be able to know the contacts of the person if you wouldn’t know their name,” dugang pa niya. Dugang pangangkon ni Rosito nga human niya kini gi-post daghang nanawag kaniya ug gikompirmar nila nga nakaila sila sa maong mga tawo ug natakboyan gyud sila sa maong virus.
“No regrets at all, why should I be regretting knowing that that information could actually save lives?” sumala pang Rosito.
Si Police Brigadier General Albert Ignatius Ferro, director sa PRO-7 miingon nga ilang gukdon ang mga tawong mag-post og mga “unverified information” nga kabahin sa COVID-19.
Si Rosito gitanggong karon sa Cebu City Police Office (CCPO) detention facility sa Gorordo Avenue samtang giandam pa ang ipasakang kaso batok kaniya. The Freeman/IBM
- Latest