Nurse gibuboan og chlorine

CEBU, Philippines — Usa ka nurse nga giingong gikan nag-duty sa tambalanan ang gipasipad-an sa riding in tandem nga nibubo sa biktima og chlorine samtang ang naulahi padung na pauli sa ilaha diha sa dalan Tres de Abril, Brgy. Tisa sa Dakbayan sa Sugbo niadtong Biyernes sa alas 8:45 sa gabii Marso 27.

Ang maong hitabo gi-post sa usa ka netizen kagahapon sa buntag nga nag-ingong usa sa ilang mga nurses ang giatake nianang adlawa sa maong dapit.

Nipadayag sa iyang kasagmuyo diha sa iyang post ang babayeng netizen tungod kay gikan pa sa tambalanan ang maong nurse.

Ang mga medical personnel sama sa mga nurses maoy giisip nga mga frontliners batok sa coronavirus COVID-19 tungod kay sila maoy tigatiman sa mga pasyente ug kanunay exposed sa maong virus.

Una niini, nangreklamo sab ang mga medical personnel nga balibaran sila pagpasakay sa mga taksi ug pasaheroan tungod sa kahadlok nga nagdala sila og virus.

“People please do not terrorize our healthcare  workers, the COVID-19 is scary enough, no need for additional  acts of abuse and vandalism,” sumala pa sa Facebook  post.

Sa pakighinabi sa The Freeman/ Banat News kang Police Major Eduard Sanchez, Police Station 6 Chief, diin nasakop ang  dalan Tres De Abril miingon nga wala sila makadawat og susamang reklamo, apan mipasalig siya nga mohimo sila og imbestigasyon kabahin niini.

Makigalayon sila sa Department of Health kun duna pa bay laing mga medical personnel nga nakasinati og susamang pagpanghasi.

Gihangyo ni Sanchez ang netizen nga nag-post niini nga moduol kanila aron sila matabangan pagpangita ug pagila sa mga naghimo niini ug sa pagpasaka og kaso.

Sa tibuok kalibotan ug dinhi sa Pilipinas, ubay-ubay nga mga medical personnel lakip na mga doktor, nurses, med techs ang nangamatay samtang nag-atiman sa mga pasyenteng natakboyan sa COVID-19. The Freeman/IBM (BANATNEWS)