Pagbantay sa Youth Home palig-onon
CEBU, Philippines — Nagtinguha ang kadagkuan sa Youth Home sa Siyudad sa Talisay nga palig-onon ang ilang pasilidad aron dili sayon ikyasan sa nga menor de edad nga gikustodiya nga karon anaa sa 38 kabuok.
Si Fe Bacaltos, officer-in-charge sa maong pasilidad, nagkanayon nga ilang gidoble ang gidaghanon sa ilang guwardiya human sila ikyasi og pito ka batan-on sa niaging buwan.
Gawas sa blue guard adunay mga job order nga kawani nga motabang sa pagbantay sa pasilidad.
Gawas nga gipalig-on ang gate ug koral, naghangyo sab sila nga mahatagan og close circuit television camera aron makatabang sa pagbantay sa mga batan-on nga nakustodiya.
Niadtong Martes sa gabii usa ka Marcelo Gerongay, 18, ang nasikop sa kapolisan gumikan sa pagkalambigit sa ginadiling drugas apan nahibaw-an nga usa siya sa nakaikyas sa maong pasilidad.
Iyang giangkon nga giplanohan nila ang pag-ikyas ug nagkasabot nga ilang layogon ang nagbantay.
Nagpasalamat si Bacaltos nga nadakpan na si Gerongay kinsa una nang natanggong gumikan gihapon sa kaso may labot ang drugas. /GMR (BANATNEWS)
- Latest
