PUI nga namatay negatibo sa COVID

CEBU, Philippines — Gipahibawo ni Cebu City Health Officer, Dr. Daisy Villa, nga negatibo sa Coronavirus Disease 2019 kadtong 27-anyos nga babaye nga namatay niadtong Marso 15.

Kini base sa resulta sa pakisusi sa Research Institute for Tropical Medicine.

Kahinumduman nga ang 27-anyos nga babaye gikonsiderar nga Person Under Investigation (PUI) sa COVID-19 human nagpakita og sintomas sa virus sama sa hilanat ug ubo ug nasuta nga nakasugat sab niini ang ubang PUIs sa Cebu.

Nahibaw-an sab nga niadto kini sa Manila diin ang mga kaso sa COVID-19 nakompirmar.

Ang maong pasyente unang na-admit sa pribadong tambalanan sa unang semana sa Pebrero gumikan sa tuberculosis meningitis.

Na-discharge kini human sa duha ka semana apan subling na-admit gumikan kay nakasinati og pagpanglipong ug pagsuka-suka.

Matud pa nga ang maong pasyente dunay pneumonia ug acute respiratory disease.

Sa wala pa gi-cremate gikuhaan kini og swab sample ug gipadala sa RITM.

Samtang ang Dakbayan sa Sugbo adunay duha ka quarantine facilities nga gitagana kung aduna gayuy mga kaso sa COVID-19.

Matud ni Mayor Edgardo Labella nga  adunay padayon nga gitrabaho karon nga nahimutang sa may Block 27 sa North Reclamation Area diin mahimo kining masudlan og 200 ngadto sa 300 ka tawo.

Dugang ni Labella nga gipaspasan sab karon ang pipila ka bahin sa Cebu City Medical Center aron mahimo usab kini nga magamit isip quarantine area.

Gitataw ni Labella nga wala sila mangindahay nga adunay matakbuyan sa maong sakit apan gihimo lang nila ang pagpangandam. Rowena D. Capistrano/GMR (BANATNEWS)