Pamilya ni Toledo mangayo og tabang sa presidente

CEBU, Philippines — Ang pamilya sa gipatay nga konsehal sa Lungsod sa Ginatilan Maria Liza Toledo nanawagan og hustisya ug lawom nga imbestigasyon sa hitabo.

Si Fema Duterte, maguwang ni Toledo nihimakak sa pasangil nga nalambigit sa ginadiling drugas ang iyang manghud.  Nanawagan sila karon sa mga otoridad og hustisya sa kamatayon ni Toledo ug pagpalawom sa imbestigasyon.  Si Duterte nipasangil nga dunay kalabutan sa politika, kalagot ug kasuya ang motibo sa pagpatay sa iyang manghud. Matud ni Duterte nga magpakitabang sila ngadto kang Senador Bong Go ug Presidente Rodrigo Duterte alang sa imbestigasyon sa hitabo.

Ang haya ni Toledo naa kini gipahimutang sa ilang pinuy-anan sa Barangay Poblacion sa maong lungsod ug gikatakda kining ilubong sa umaabot nga Miyerkules, Marso 18, 2020. – Rowena D. Capistrano/BDB

Nanion og replica nga pistola sikop

Nagtingkagol sa detention cell ang usa ka 47-anyos nga lalaki human kini nanion sa gidala niini nga replica sa kalibre .45 nga pistola niadtong Huwebes sa buntag diha sa Barangay Labogon, Dakbayan sa Mandaue.

Ang suspetsado mao si Rey Sarda, minyo, residente sa Barangay Colawin, Lungsod sa Argao.

Ang biktima mao si Rolando Amoritcha, 28, minyo, nagpuyo sa Barangay Labogon.

Ang kapolisan dali nga niresponde sa nadawat nila nga taho kabahin sa lalaki nga nagdala og armas ug nanion ngadto sa biktima.

Giingong si Sarda naaktohan nga naghupot og replica sa kalibre .45 airsoft gun nga adunay usa ka plastic magazine nga gition ngadto sa biktima

Ang suspetsado gidala diha sa Police Station 3 sa Mandaue City Police Office (MCPO). /BDB (BANATNEWS)