Mga kawani sa gobiyerno pahatagan og diskwento sa malls

CEBU, Philippines — Giawhag ni Gob. Gwendolyn Garcia ang mga malls sa Dakbayan ug Probinsiya sa Sugbo nga mopatuman og diskwento sa ilang pamaliton aron makadani og mga customer.

Kini nunot sa pagminus sa mga mosuroy tungod sa hulga sa coronavirus disease.

Matud ni Garcia nga mas maayo nga mohatag og diskwento aron adunay halin kaysa walay mamalit.

Usa sa nakita nga paagi ni Garcia mao ang paghatag og bisan 10% discount sa mga empleyado sa munisipyo pinaagi sa pagpakita sa ID.

Ang pangulo sa League of Municipalities in the Philippines, Liloan Mayor Christina Frasco, nagkanayon nga andam motabang ang lungsod pinaagi sa paghatag og sakyanan nga mokarga sa mga pasahero nga mosuroy sa siyudad.

Usa sa mga representante sa mall nagkanayon nga ila kini ipadangat sa ilang mga tenants sanglit dili man sila kapugos nga paubsan ang presyo sa mga baligya niini.

Atol sa tigum ni Garcia uban ang mga representante sa resorts, hotels ug malls sa probinsiya gihisgutan ang pag-ubos sa occupancy rate sa mga accommodation establishments tungod gihapon sa COVID-19.

Sama sa mga malls giawhag sab ni Garcia ang mga hotels ug resorts nga mohatag og diskwento ilabi na ang mga mahalon nga accommodation establishments. Kini aron makadani og mga taga lungsod nga adto matulog sa hotels kun moari sa siyudad.

Matud ni Garcia nga ang domestic tourism ang kinahanglan tutokan karon tungod sa epekto sa COVID-19 sanglit ubay-ubay na ang nakanselar nga mga biyahe gikan sa China, Macau, Hongkong ug usa ka probinsiya sa South Korea.

Si Department of Tourism 7 Director Shalimar Tamano nagkanayon nga mas maayo ipatuman kini dayon aron makita sa ubang taga probinsiya nga sa Sugbo kompiyansa ra gihapon ang mga Sugboanon nga mosuroy taliwala sa hulga sa COVID-19 tungod kay adunay precautionary measures nga gihimo.

Gitataw sa DOT nga ang Sugbo nagpabilin nga COVID-free. —/GMR (BANAT NEWS)