Public schools sa Talisay way klase tungod sa linog
CEBU, Philippines — Tungod sa linog nga nabatyagan sa Central ug Eastern Visayas kagahapon sa kaadlawon mideklarar si Talisay City Mayor Gerald Anthony “Samsam” Gullas Jr. nga way klase sa tanang pangpublikong tunghaan sa dakbayan.
Matud pa nga gitawgan ni Gullas si Department of Education (DEPED) schools division Superintendent Evangel Luminarias aron ideklara ang way klase sa elementarya ug sa high school sa siyudad.
Ang mga tunghaan sa Talisay adunay tag duha ngadto sa tulo ka andana ug gikabalak-an sa mayor nga basin natandog ang estraktura ug mabutang sa peligro ang mga bata.
“Since we have high-rise classrooms which have 2 to 3 floors in schools, we will use this suspension of classes to check the integrity of our school buildings,” nagkanayon si Gullas.
Hinuon gamiton sab ang adlaw nga way klase sa pagpreparar sa mahitabo unya nga aftershocks. Mga alas 5:19 sa kadlawon nahitabo ang linog gikan sa epicenter niini sa Capoocan, Leyte nga adunay 5.7 magnitude ug gilarmon nga 13 kilometer.
Si Engr. Audie Bacasmas, pangu sa City Engineering Office nagkanayon nga gisusi nila ang mga schools buildings ug base sa pasiuna nilang nadawat nga report way dakong kadaut nga naangkon ang mga edipisyo.
Earthquake drill
Sa pikas bahin, ang City Disaster Risk Reduction Management Office sa Mandaue gikatakdang magpahigayon og lapad nga earthquake drills karong Marso 12, 2020 diha sa Mandaue City Sports and Cultural Complex sa Sitio Tribunal sa Barangay Centro.
Dunay 500 ka mga kawani sa siyudad ug mga tinun-an nga mosalmot sa maong kalihokan.
Ang Office of the Civil Defense in Central Visayas (OCD-7) maoy nagpili nga ang Dakbayan sa Mandaue maoy mahimong pilot area sa quarterly Nationwide Simultaneous Earthquake Drill (NSED) nga pagahimoon sa maong adlaw. Ang NSED maoy programa nga gipatuman OCD sa matag tungatungang bahin sa tuig isip pagpangandam sa katalagman pinaagi sa National Disaster Risk Reduction and Management Council.
Niadtong bulan sa Hunyo sa miaging tuig 2019 maoy mipakita sa ilang kahanas sa pagtubag sa katalagman sa linog ang mga sakop sa CDRRMO sa Dakbayan sa Lapu-Lapu.
Si Riza Joy Hernandez , OCD-7 information officer miingon nga gipili ang dakbayan sa Mandaue sanglit gawas nga daghang molupyo, ug usa kini ka urbanized city daghan na usab ang gitukod nga mga tag-as nga edipisyo..
“With these three conditions, this area would be greatly affected if ever an earthquake would hit the city,” ni Hernandez pa sa iyang pamahayag.– Gabriel Bonjoc ug Romeo T. Limpangog/IBM
Indian national gipatay
Patay ang usa ka Indian national nga gipusil sa riding in tandem diha sa Barangay San Vicente, Lungsod sa Liloan alas 5 ang takna sa hapon niadtong adlaw nga Domingo.
Si Police Major Danilo Colipano, hepe sa Liloan Police Station miila sa biktima nga mao si Jagdish Singh, 25, nagpuyo sa Barangay Poblacion Oriental sa Lungsod sa Consolacion.
Sa pasiuna nga imbestigasyon nagmotor ang biktima ug nag-angkas ang ig-agaw niining lalaki.
Matud pa ni Police Senior Master Sergeant Jonas Catubig, Desk Officer sa Liloan Police Station, nag-urong ang biktima sa maong lugar tungod kay nitubag sa sugo sa lawas ang ig-agaw niini.
Sumala pa ni Catubig, dunay naabot nga duha ka lalaking nagmotor ug gitaparan ang biktima. Gikatahong ang wala mailhing mamumuno naka full-faced helmet dayon gipusil niini ang biktima sa makadaghang higayon.
Ang mga mamumuno daling mipasirit padagan sa ilang motor palayo sa lugar. Si Colipano miingon nga mohimo pa sila og dugang imbestigasyon sa aron pagtino sa motibo sa pagpatay sa biktima. Rowena Capistrano/IBM (BANATNEWS)
- Latest