Modernong jeep magsugod na sa operasyon sa Lapu-Lapu
CEBU, Philippines — Gikatakda na ang operasyon sa mga airconditioned modern jeep ubos sa Euro-4-engine diha sa Dakbayan sa Lapu-Lapu.
Si Malvin Arias, chairman sa United Drivers-Operators Transport Cooperative (Udotco) nagkanayon nga ang 20 ka modern ug air conditioned nga Public Utility Jeep (PUJ) ang gihatagan og provisional authority nga giisip nga maoy labing unang hugna sa mga Euro- 4 modern jeepney sa maong dakbayan.
Sa nasayran nga ang Udotco nakabaton og 50 ka units sa nahisgutang modern jeep diin matag usa niini nagkantidad og P2.2 milyones gikan sa Hino Motors Philippines. Matud ni Arias nga gikan kini sa nakuha nilang loan sa Development Bank of the Philippines diin ang maong loan bayaran kini sulod sa pito ka tuig. Ang ilang kooperatiba aduna kini 1,000 ka sakop nga gilangkuban sa mga jeepney ug tricycle driver ug mga operator nga nahimutang sa Central Visayas. Gibutyag ni Arias nga 300 ka jeepney ug tricycle driver ug operator ang ilang sakop sa Dakbayan sa Lapu-Lapu.
Gitataw ni Arias nga ang 20 nila ka modern jeepneys magabiyahe kini sa mga rota gikan sa Marigondon sa Dakbayan sa Lapu-Lapu paingon ngadto sa merkado publiko, Punta Engaño ug Tamiya sa Barangay Basak diin ang minimum niining pletehan P9.50.
Ang mga drayber sa maong mga jeep magdawat og standardized nga sweldo diin pasabot niini nga aduna sila’y fixed rate sa matag adlaw ug wala na mag-agad kon makapila sila makatuyok sa ilang pagbiyahe sulod sa usa ka adlaw nilang pagpamasahero. –/BDB (BANATNEWS)
Kapitan sa Zapatera nibalik na
Rowena D. Capistrano
CEBU, Philippines — Nibalik na sa pag-report sa barangay human sa 60 ka adlaw nga pagkasuspenso niini si Kapitan Francisco Benedicto sa Barangay Zapatera, Dakbayan sa Sugbo. Sa pagbalik ni Benedicto nisuroy dayon kini sa iyang barangay ug niimplementar sa kamandoan ni President Rodrigo Duterte ug sa Department of Interior and Local Government sa paghawan sa kadalanan ug pagbalik sa 3-meter easement sa mga sidewalk. Gipahimangnoan ni Benedicto ang mga nakalapas sa lagda sa paghawan niini tungod kay andam sila sa barangay nga mopatuman sa kamandoan sa presidente ug sa DILG.
Atol usab sa pagbalik ni Benedicto gipaabot niya ang desisyon sa DILG nga tubag kalabotan sa pagtangtang ug pag-ilis sa iyang mga sakop samtang siya nagserbisyo sa iyang suspension order. Gitug-an ni Benedicto nga si Cebu City Mayor Edgardo Labella ni-refer sa iyang concern ngadto sa buhatan sa DILG aron mahatagan og kasulbaran ug masuta ang legalidad niini. /BDB (BANATNEWS)
- Latest