Mga sapa ipaubos sa water testing
CEBU, Philippines – Human nagpositibo sa poliovirus ang Butuanon River, gimanduan ni Cebu City Mayor Edgardo Labella ang City Health Department nga magpahigayon og water testing sa tanang sapa sa siyudad ubang sa Department of Health.
Ang mga sapa nga ipailawom sa water testing naglakip sa Guadalupe, Kinalumsan, Bulacao, ug uban pa.
Una nang gibutyag ni Labella nga ang relocation plan alang sa mga informal settler, lakip na ang mga ubay sa mga pangpang sa Butuanon River, kanunay anaa. Dihang nigawas ang balita sa pagpositibo sa Butuanon River sa poliovirus, matud ni Labella na nilihok dayun ang CHD nga gipangulohan ni City Health Officer Daisy Villa aron paghimo og profiling sa sulod sa lima ka kilometro nga radius. Ang Butuanon River niagi sa Barangay Pit-os, Talamban, Bacayan, ug San Jose samtang sumpay niini mao na paingon sa Dakbayan sa Mandaue.
Ang CHD sa Mandaue nipahimangno na sa molupyo duol sa Butuanon River nga naglakip sa Barangay Maguikay, Ibabao Estancia ug Paknaan.
Matud ni Dr. Rose Marie Ouano-Terado, city health officer sa dakbayan, nga kini subay sab sa mando ni Mayor Jonas Cortes.
“We will declare the Butuanon, Mahiga, and Tipolo Rivers, and its tributaries off limits to the general population,” matud ni Cortes.
Nunot niini gihingusgan sa lokal nga kagamhanan ang vaccination program kontra polio ingon man ang information dissemination sa pagpugong alang sa kakuyaw sa pagtakboy sa maong sakit ngadto sa mga bata. Ang mga bata nga nag-edad og 15 anyos paubos mao ang labing dali nga matakbuyan sa maong sakit nga mamatikdan pinaagi sa hilanat, sakit sa ulo, pagsuka ug panakit sa mga lutahan nga moresulta sa pagkaparalisado. Romeo T. Limpangog/GMR (BANAT NEWS)
- Latest
