Beneficiaries sa 4Ps kutob na lang sa pito ka tuig

CEBU, Philippines – Kutob lamang sa pito ka tuig ma-enroll ang mga beneficiary sa Pantawid Pamilyang Pilipino Program (4Ps).Kini ang gibutyag ni Secretary Rolando Bautista sa Department of Social Welfare and Development.

Matud ni Bautista nga kaniadto mahimong magpabilin sa programa ang usa ka beneficiary hangtud nga mahaw-as kini sa ka kabus.

Apan karon kutob na lang sa pito ka tuig ang ilang enrollment subay sa Akta Republika No. 11310 nga nag-institutionalize sa 4Ps nga programa sa ahensiya.

Gipasabot ni Bautista nga kadtong mo graduate sa 4Ps saw-on kini sa sustainable livelihood program ug siguradohon sa ahensiya nga dili na kini mabalik sa kanhi nila kahimtang.

Gawas niini, ubos sa maong balaod gipadak-an usab ang mga benepisyo nga madawat sa mga miyembro.

Gikan sa P700 ang madawat sa matag pamilya alang sa ilang monthly healthcare cash grant, karong himuon na kining P750, samtang P700 ang educational cash grant sa matag tinun-an sa senior high school, P500 sa junior high school ug P300 sa mga tinun-an sa kindergarten ug elementarya.

Magpabilin usab ang P600 kada buwan alang sa rice subsidy ug P300 kada buwan nga dugang ayuda nga gituyo aron makunhoran ang epekto sa Train Law.

Nasayran nga sugdan na karong tuiga ang pagpatuman sa bag-ong 4Ps law diin duna kini pundo nga P108.8 bilyones.

Dugang ni Bautista nga target nila nga maka-enroll og 4.4 milyones ka miyembro sa 4Ps diin niadtong tuig 2019 nikabat sa 4.1 milyones ang ilang kinatibuk-ang miyembro sa programa.

Nasayra nga sa Central Visayas adunay 267,000 ka miyembro sa 4Ps. /BDB (BANAT NEWS)