Kanhi polis nibabag sa buybust gidakop
CEBU, Philippines – Gidakop ang kanhi polis sa Parian Police Station sa kasong Obstruction of Justice sa Barangay T. Padilla Dakbayan sa Sugbo tungod matud pa pagbabag sa gipahigayon nga buybust operation dihang gidakop ang pagumangkon sa iyang asawa.
Matud ni Police Major Armado Labora hepe sa Parian Police Station subject sa operasyon si Valtjune Donaire, 26, kinsa nakuhaan og mga pinaketeng gidudahang shabu.
Apan giingong miduol si kanhi SPO3 Armando Devillares nga nagpailang polis ug gikwestyon ang pamaagi sa operasyon. Sumala pa nga nagsige og hasi didto ang kanhi polis ug nakapatapok na hinuon sa daghang mga tawo.
Tungod niini gimando ni Labora nga dalhon nalang sa police station si Donaire paglikay sa kagubot, apan giingong nisunod gihapon si Devillares ug nagpadayon sa pangasaba sa mga operatiba.
Tungod niini, giapil siya sa pagdakop ug pasakaan og kasong obstruction of justice. Gibanabana nga P3 mil nga balor sa gidudahang shabu ang nasakmit kang Donaire nga giingong mamaligyaay og illegal nga drugas sa maong dapit. /IBM (BANAT NEWS)
- Latest