2 NPA leaders nadakpan sa Bohol

CEBU, Philippines —  Managkapuyo nga giingong mga taas nga opisyal sa New People’s Army (NPA) didto sa Bohol nadakpan sa joint operation sa Bohol Provincial Police Office (BPPO) ug Task Force Bohol diha sa Siquior sa Purok 7 Barangay Tulang lungsod sa Getafe sa Probinsya sa Bohol.

Ang mga dinakpan mao sila Reynaldo Camacho, 50, nga nagdala og mga alyas nga Baler, Chad, Jeboy ug Val Camacho ug ang iyang kapuyo nga si Carmelita Caneda, 48, nga nagdala sab og mga alyas nga Mauren ug Inday.

Matud ni BPPO Director Police Colonel Jonathan Cabal nga gidakop ang duha pinasikad sa warrant of arrest nga giluwatan ni Judge Suceso Arcamo sa Regional Trial Court 7 Branch 47 sa Dakbayan sa Tagbilaranm Bohol tungod sa kasong murder.

Ang duha giingong dunay kalabutan sa pag-ambush patay kang 2nd Lieutenant Cue ug laing 12 ka mga sundalo sa Lungsod sa Sagbayan niadtong tuig 2000.

Matud ni Cabal tingkolekta og revolutionary tax sa mga negosyante sa Negros Oriental para sa NPA ang duha.

Matud pa ni Police Regional Director Police Brigadier General Albert Ferro nga giila nga mga hardcore combatants ang duha.

“Meaning to say that, these hardcore communist terrorist group (aside extorting money from the civilians) are also involved in other criminal terroristic activities like placing improvised explosive device for the troops,” matud pa ni Ferro.

Dugang pa ni Ferro nga sakop ang duha sa Komiteng Rehiyonal Central Visayas, Regional Staff ug kasamtangang National Finance Commission Operations Group for the Visayas.

Atol sa pagdakop sa duha, dunay nakuhang mga armas ang kapolisan nga naglakip sa kalibre 45 pistola, 38 revolver, duha ka fragmentation hand grenades (pineapple- type) ug mga nagkalain-laing explosives device, explosives components ug subersibong dokumento.

Ang duha dugay ng gipanid-an sa PNP ug AFP sa dihang dunay nakatug-an kanila bahin sa ilang nahimutangan. Bisan didto nadakpan ang duha sa Bohol, apan giingong sa Negros Island sila nag-operate.

Hapit nasad dekada gikan nga gideklarar ang Bohol nga insurgency free sukad nga nanglayas ang mga armadong NPA ug nalamhin didto sa Negros.

Gibutyag sab ni Colonel Jerry Borja ang commander sa 47th Infantry Battalion nga niadtong Septiyembre sa milabay nga tuig nideklarar sab ang Bohol Provincial Government nga persona non grata sa mga komunistang grupo diha sa ilang probinsya.

Gituohan ni Ferro nga napiangan gyud karon ang NPA sa Central Visayas sa pagkasikop sa duha.  IBM (BANATNEWS)