P28 milyones marijuana gilarot; P5.8 milyones shabu nasakmit

CEBU, Philippines – Mokabat sa P28 milyones nga balor sa marijuana ang nalarot sa mga sakop sa Cebu Provincial Police Office ug Philippine Drug Enforcement Agency sa Sitio Quo, Gaas, Balamban.

Matud ni Balamban Police Station chief, Police Major Christian Torres, nga katulo na nila gironda ang lugar diin balik-balikan kini og tanum sa marijuana.

Tungod sa kalisud sa agianan ug tago kaayo ang dapit, kinahanglan pa kini nga palauparan og drone aron makita ang mga gitanum nga marijuana sa tulo ka luna.

Gipangita pa ang nananum sa maong mga marijuana nga giila nga sila si Rodrigo Cabalis, Lordi Progosa ug Tisip Plando.

Sa laing bahin mokabat sa P5.7 milyones nga balor sa shabu ang nasakmit sa buy-bust operation sa McArthur Boulevard, Villagonzalo 1, Tejero, Dakbayan sa Sugbo.

Gipangulohan ni Police Major Randy Caballes, hepe sa City Intelligence Branch sa Cebu City Police Office, ang dinakpan giila nga si Jake Paca Labitad, 25, lumad nga taga Campo 4, Dakbayan sa Talisay.

Dugang ni Caballes nga gikonsiderar nga high-value individual sa Dakbayan sa Sugbo ang suspek tungod sa kalapad sa lugar nga baligyanan niini.

Samtang 14 sab ka tawo ang nasikop kinsa usa niini ang menor de edad nga babaye ang na-rescue atol sa buy-bust operation sa mga tinugyanan sa PDEA-7 ug kapolisan sa may Sitio Kawayan, Mambaling, Dakbayan sa Sugbo diin lakip sa gipuhag ang drug den alas singko sa hapon niadtong Martes.

Ang mga nasikop mao sila si Samuel Reyes, subject sa buy-bust, ug kauban niini nga si Christian Aque ingon man ang mga nibisita sa drug den nga sila si Jayson Jerusalem, Adam Abella, Jordan Rosito, Joann Selitotio, Jesus Flores, Jojo Flores, Manuelito Ormillo, Domelo Bastismo, James Alcansado, Hervic Custas, Wingwing Lagaras ug ang 16-anyos nga babaye nga usa ka tinun-an.

Nasakmit gikan sa mga dinakpan ang 28 ka gagmay nga pakete sa shabu nga mobalor og P150,000, usa ka cellphone, kwarta nga dul-an sa P2,000 ug mga kagamitan sa pagsuyop og shabu.

Matud ni Leia Albiar-Alcantara, tigpamaba sa PDEA-7, nga dili mominus sa tag 100 gramos sa ginadili nga drugas ang madispatsar sa subject ngadto sa iyang mga parokyano. Rowena D. Capistrano/GMR (BANAT NEWS)